خلال حلولها ضيفةً على برنامج "تفاعلكم" المذاع على "يوتيوب"، علّقت الفنانة غادة عبد الرازق على مشاركة الفنانة ليلى أحمد زاهر معها في مسلسل "تلت التلاتة"، الذي يُعرض حالياً، على الرغم من تصريحات والدها الفنان أحمد زاهر عن وجود خلافات بينهما.

وقالت غادة: "أنا مختارة ليلى من قبل ما أحمد يطلع في برنامج ويقول إن فيه مشاكل بينا، أنا نفسي استغربت أوي كلامه، إحنا عمرنا ما اتخانقنا، هو أكيد حد وصّله كلام غلط فهو اتضايق مني من غير ما يرجعلي".

وأضافت: "لما ده حصل قالولي طيب ليلى هتكمل ولا إيه؟ قولتلهم ليلى هتكمل طبعاً؛ لأن مهنة التمثيل بروفيشنال، ومش هصفّي مشاكلي الشخصية في أكل عيشي، مهنة التمثيل دي هي اللي عملتني".

ووجّهت نصيحة لأحمد زاهر، قائلةً: "بنصح أحمد إنه يتأكد من الحاجة قبل ما يقولها لأن الموضوع عدّى معايا عشان أنا ست ذكية وخبرتي كبيرة، بس لو حصل مع حد تاني معندوش خبرتي مش هيتقبل ده وهتحصل مشكلة".

وعن سبب تسارع وتيرة الأحداث في مسلسل "تلت التلاتة"، قالت غادة: "اللي خدم مسلسل "تلت التلاتة" إن أحداثه تكون متسارعة وريتمها سريع إنه هو كان معمول 30 حلقة وقصرناه لـ 15 عشان ضيق وقت التصوير، وجت من عند ربنا إن لما ده حصل خلّى ريتم الأحداث أسرع ومشوقة أكتر".

كما تحدثت عن الأسباب التي دفعتها لتقديم مسلسل "تلت التلاتة"، وكشفت كواليس تصوير المشاهد التي تجمع الشخصيات الثلاث التوائم في العمل، ووجّهت نصيحة الى السيدات اللواتي يتعرضن للخيانة من أزواجهن، بالقول: "اللي شدني فيه إنه مكتوب حلو أوي وفكرة الثلاث شخصيات التوأم حمستني، لأن كان اتعرض عليا كتير زمان إني أجسد فكرة التوائم بس كانوا بيبقوا اتنين بس، فكنت بشوفها مستهلكة أوي ومفيهاش جديد أقدمه للناس".

وتابعت: "وتمسكت أوي إن الثلاثة توائم يبقوا شبه بعض شكلاً في كل حاجة، وأنا شوفت ده في الحقيقة إن يكون توائم نسخة من بعض في الشكل والتعامل، وحسيت إن منطقة التشويق دي شبهي لأني نجحت فيها زمان الحمد لله".

وأضافت: "وشدني إن الدور فيه تحدي إني أعمل ثلاث شخصيات توائم نسخة من بعض خارجياً، لكن مختلفين تماماً داخلياً، فده كان تحدي لغادة عبد الرازق إني ألعب ثلاث شخصيات، ومن ضمن صعوباته إن في المشاهد اللي بتجمع الشخصيات دي مع بعض ببقى واقفة بمثل ومفيش حد قدامي".

وفي ختام حديثها، تطرّقت غادة عبد الرازق الى كيفية تصوير مشاهد التوائم، قائلةً: "اللي بيحصل إن مثلا يبقى مشهد فيه الثلاث شخصيات مع بعض، بلبس الأول لبس فريدة وأدخل أقعد على الكرسي مكانها، وأبص في اتجاه فرح وفريال وأكلمهم، وبعدين ألبس تياب فرح وفريال وأتكلم في اتجاه الاتنين التانيين، وببقى شبه المجانين قدّام فريق العمل".