رغم سعادة الفنانة إيمان العاصي، بنجاح دورها في مسلسل "جعفر العمدة"، للنجم محمد رمضان، وتجسيدها شخصية دلال في المسلسل، إلا أنها كشفت خلال حلولها ضيفة في برنامج "تفاعلكم" الذي تقدمه سارة الدندراوي على قناة "العربية"، أن الدور أثر في حياتها بشكل كبير للدرجة التي أصبحت معه تخشى الخروج من المنزل خوفاً من رد فعل الناس تجاهها.

وقالت العاصي: "مش عارفة أتعامل مع الناس ومستخبية في البيت وخايفة أقابل الناس.. بس أنا مخضوضة زي الناس، والجمهور مسميني حسناء الشعبية، وحابين حالة الحب بين دلال وجعفر وإنها الحضن الحنين بتاعه، ومرة واحدة اتفاجئوا إنها هي سبب الشوكة اللي محطوطة في ضهره طول العمر".

وأضافت: "كنت متوقعة النجاح من وإحنا بنقرأ المسلسل وبنعمل بروفات، وأستاذ محمد سامي كان عنده طاقه بيوزعها على فريق المسلسل كله، وإننا هننجح نجاح لم نحققه قبل كده وهنفضل مبسوطين 10 سنين قدام بالنجاح ده، وكنت عارفة إن فيه نجاح قوي، بس مش متخيلة بالطريقة العظيمة دي كل يوم عندنا نجاح وحكاية والجمهور بيكتر ويكبر كل يوم".

وأردفت: "دايمًا بتحط في دور البنت الحلوة والرومانسية والكيوت وأنا ده عملي أزمة وخلاني أقعد كتير أتعطل لأن مفيش حاجة تانية أضيفها لكاركتر الكيوت، وحسيت إن دور دلال حاجة بدور عليها طول عمري وبدور عليه من بداية مشواري الفني ولقيتها وبقيت ماسكة فيها بكل قوتي وإن دي فرصتي.

وكشفت إيمان عن رأيها في الزواج الثاني، وإمكانية تقبلها أن تكون زوجة ثانية، مثل دورها في مسلسل "جعفر العمدة"، قائلة: "في الحقيقة مقدرش أتجوز راجل متجوز لأني ست غيورة جدًا جدًا، ومقتنعة إن ده حلال ربنا ولكن لا يكلف الله نفسًا إلا وسعها".

وأضافت: "أكيد اتعرض عليّا حاجات كتير شبه كده، ولكن مستحيل أقبل أكون زوجة ثانية، مقدرش، ومش هعيش سعيدة هعيش تعيسة وهتعسه معايا".

وعن رد فعل ابنتها على شخصية "دلال" قالت: "بنتي مش من عادتها إنها تعلق على أي حاجة اشتغلتها ولا بتتفرج على مسلسل طويل لكن متابعة "جعفر العمدة" وطول الوقت تسألني إن كنت فعلا خطفت الولد، هي مصدومة إن مامتها الشريرة وبتقولي فضحتيني في المدرسة".