بالفيديو - روجينا تتحدث عن تفاصيل شخصية "ستهم"... وهذا سبب إصابتها بالإغماء

خلال لقائها مع برنامج ET بالعربي، تحدثت الفنانة روجينا عن تحضيرات شخصية "ستهم"، التي تجسدها خلال أحداث المسلسل الذي يحمل نفس الاسم وتخوض به السباق الرمضاني الجاري.

وقالت روجينا: "لكل مجتهد نصيب ورد الفعل جميل جدًا على الشخصية، لأنها شخصية حقيقية من المجتمع، والناس متأثرة بالست المصرية اللي اتظلمت ولبست توب الرجال ونزلت تشتغل والمجتمع بيرفضها وبيقهرها، ودي رحلة صعبة على أي ست أنها تخوضها، أنا لما جربت التجربة دي، سيبت ستهم وبقيت أنا روجينا بتفرج على الست دي".

وتابعت: "أول ما صورنا الصورة من غير شعر اللي نزلت من شهور، عملنا مشهد الحلاقة وبالفعل أنا حلقت شعري، واتكتب مشاهد وستهم من غير شعر وأنا كان شعري بدأ يطلع، قولتلهم مش هقدر أحلق شعري تاني، وهما كانوا عايزني طول المسلسل زي الرجالة كل ما شعري يطلع أحلق، قولتلهم أنا حلقت مرة ومهما حصل مش هقدر أعملها تاني".

وأضافت روجينا أنها عانت من حالة نفسية بسبب حلاقة شعرها، قائلة: "جاتلي حالة نفسية بعد الحلاقة ومش قادرة أشوف نفسي في المراية، في البيت بقيت مسار سخرية، وبيقولوا علشان تعملي شخصية عملتي كده في نفسك؟ وأنا حسيت إحساس وحش بصراحة ورفضت أحلق شعري تاني، وبحط شعر مستعار لو في أي تكريم أو مناسبة.

كما كشفت روجينا عن أصعب مشاهد المسلسل، قائلة: "أصعب مشهد صورته كان مشهد موت الابن، كان صعب جدًا عليا وبعد ما خلصت المشهد اترميت في الأرض وجاتلي حالة هيستريا، ولغاية دلوقتي مش مظبوطة نفسيًا وعندي حالة من الظلم والقهر جوايا، وعندي ردود أفعال للأشياء زي الرجالة".

وتابعت: وأنا بضرب الراجل في الجبل كنت عايزة أثبت إني جامدة واتضح إن الزجاجة اللي مسكاها في المشهد حقيقية وفتحت راس الراجل ووقعت أغمى عليا".