حلّت الفنانة شيرين رضا ضيفةً على برنامج "أنا والقناع" وتحدثت عن رفضها لما يسمى مصطلح "السينما النظيفة"، مؤكدة أنها لا توافق على تصنيف السينما والتفرقة بين الأعمال بحسب أهواء البعض، مشيرةً إلى أنها مقتنعة بتصريحاتها أن مصطلح السينما النظيفة "شتيمة".

وقالت شيرين: "هو يعني إيه سينما مش نضيفة عشان يتقال المصطلح دا؟ السينما فن عمره ما هيكون مش نضيف". وأضافت: "منقدرش نعمل أفلام كلها حب وأفلام بنهاية سعيدة دي مش الحياة، في حاجات بتحصل في الحياة بنمثلها في السينما عشان نقرب للحياة الحقيقية".

وعن رأيها في تحفظ بعض النجمات على القُبلات أو ارتداء المايوه أو المشاهد الساخنة، قالت: "كل واحد حر، وأنا شخصياً بعمل اللي يناسبني أنا، وكل فنانة بتعمل اللي يناسبها ويناسب ظروفها وحياتها".

وأضافت أنها لم تقدّم مشهد قُبلة في السينما، باستثناء قبلة واحدة، قائلةً: "ولا ندمانة عليها ولا فخورة بيها دا كان دور أنا بلعبه وكان فيه قبلة في مكانها، زي ما بمثل دور وأكلت فيه، دا زي دا بالظبط".

وأكدت شيرين أنها سعيده بالعمل مع جميع النجوم الذين قدّمت أدواراً أمامهم، قائلةً: "اشتغلت مع ناس كلهم تبقى فخورة إنك اشتغلتي معاهم، كلهم موهوبين وعظماء وكل حد يتمنى إنه يمثل معاهم وأنا جالي الفرصة أمثل معاهم كذا مرة، اختار مين ولا مين".

وأكدت أنها تحب الفنان محمود حميده، قائلةً: "بصور معاه دلوقتي وبحبه جداً واشتغلنا مع بعض كتير وعارفين نشتغل مع بعض"، موضحة أنها تحب أيضًا الفنانين أحمد زكي وكريم عبد العزيز.

وكشفت شيرين أن الفنان الذي تمنت أن تشارك معه في عمل سينمائي هو الفنان محمد سعد، قائلةً: "بموت فيه وبحب أفلامه أوي وبيضحكني جداً".