كشفت الفنانة جوري بكر تفاصيل دورها في مسلسل "جعفر العمدة" حيث تحدثت عن وجود نماذج في حياتها تشبه شخصية وداد التي قدمتها في المسلسل، ورد فعل الجمهور على دورها أثناء سيرها في الشارع، كما تكلمت عن مشهد ضرب الفنان منذر رياحنة لها بعد طرده لها، وتفاصيل تحية الفنان عمرو دياب لها بعد نجاحها في دورها.

قالت جوري في تصريحات إعلامية: "اندمجنا في المسلسل، نزلت الشارع، ولكن اتخضيت مش عارفين نمشى في الشارع والناس بتجري ورانا، وبينادوني بوداد، وكله بيقول إزاي عملتي كدا، وإيه الجبروت ده.

وتابعت: "أحمد فهيم كان رهيب، علاقتي معاه في المسلسل حسينا إن إحنا سيد ووداد، وكان بيبقى مركز تركيز رهيب، وكان بيساعدني بشكل كبير في المسلسل أنا عيطت بسبب مشهد سيد، وطلبوا من محمد سامي مشهد يجيبوا وداد من شعرها، ولو سابهم كان هيبقى دمار شامل، وهيضربوني بجد، وفي مشهد منذر رياحنة شدني من شعري جامد، وأكتر حاجة قاسية تعملها مع بنى آدم تكون بخيل بمشاعرك".

وتابعت: "تشرفت بالعمل مع فتوح كان عايش الشخصية، وكان متقمص الدور جدًا، وكنت مخضوضة منه، ومش قادرة أقتنع إنه بنى آدم طبيعي، وكلنا كنا مبسوطين، وهو كان مصمم إنه إحنا نراجع المشاهد".

وأضافت: "محمد سامي المايسترو بتاع مسلسل جعفر العمدة، وأنا اتخضيت أول ما قرأت الورق، ولكن محمد سامي كان بيذاكر لي المشهد، وخلاني أثق في نفسي كممثلة".

وبشأن تفاعل عمرو دياب معها وفريق عمل «جعفر العمدة»، أثناء حضورهم، حفله بالغردقة، قالت: "في وسط حشد كبير عمرو دياب كان بيسلم على هالة صدقي، واتكسفت وقلت أكيد مش عارفني، وبعد كده قال اسمي، واتبسطت جداً إن عمرو دياب اتفرج على المسلسل وقال اسمي، ولازم أشكر جوزي حبيبي وكان حاسس إن هو هينادي اسمي، ووداد كانت وحشة قوي".