أكدت الفنانة غادة عبد الرازق خلال استضافتها في إحدى الندوات الفنية أنها لا تمانع في تقديم سيرتها الذاتية في عمل فني، حيث قالت: "ممكن أقدّم فيلم وثائقي عن حياتي وهستعرض فيه كل جوانب حياتي... أنا حياتي كتاب مفتوح للناس كلها... الناس عرفت كل حاجة عني وعن بنتي وأحفادي وغلطاتي". وأضافت: "كنت زمان بتضايق من تدخل الناس في حياتي، لكن دلوقتي بعرف أرد وأقول أنت مالك؟".

وعن تأكيد الجمهور أن أنجح أعمالها هي التي قدّمتها مع المخرج محمد سامي، قالت غادة: "بالنسبة للناس اللي بتقول إن أنجح أعمالي هي مسلسلاتي مع محمد سامي، أحب أقول إن أصلاً الناس في الشارع مش بتكلّمني على "مع سبق الإصرار" و"حكاية حياة"، هم بيكلموني على أعمالي التانية، أبرزها "الكابوس"، و"أرض جو" برضه، ولو الناس بتتكلم كتير على أعمالي دي، فده لأنهم همّا اللي عملوا نقلة".

وعن رحيل الفنان مصطفى درويش في سنّ صغيرة، قالت غادة عبد الرازق: "كان يوم مصيبة، أنا فاكرة اليوم ده وكنت بفطر وبفتح التليفون، وحد قاعد جنبي قالي مصطفى درويش مات، وفتحت التليفون عندي ملقتش حد منزّل، ودخلت على الأخبار لقيت صورته ومصدقتش".

وعن سبب وفاة الفنان مصطفى درويش، قالت: "ربنا يرحمه، مصطفى طلع في ناس كتيرة بتحبه، ومكتشفتش ده غير بعد ما مات، كان خاسس جداً في المسلسل وأنا سألته، والفترة اللي فاتت على طول كان بيروح الجيم، والموت بتاع ربنا، ومتهيألي الحاجات اللي بياخدوها في الجيم بتأثر، والمفروض بتتاخد لناس معينة يتحملوا الكمية، الممثل مش مطلوب منه ده، وبياخدوا الحاجات ديه بيعملوا جيم كتير أوي، وساعات عمل كتير طويلة، وقلة نوم وتفكير، ممكن فجأة يعمل هبوط في الدورة الدموية، وده خطر جداً".

وكشفت غادة عبد الرازق عن عمرها الحقيقي قائلةً: "مقدرش أصوّر عدد ساعات طويلة، كنت ممكن أعمله وأنا صغيرة عندي 20 سنة، لكن دلوقتي عندي 52 سنة مقدرش، رحم الله امرأً عرف قدر نفسه".

يُذكر أن غادة عبد الرازق شاركت في السباق الرمضاني الماضي بمسلسل "تلت التلاتة"، الذي حقق نجاحاً باهراً، وضم عدداً كبيراً من النجوم، أبرزهم: محمد القس، مصطفى درويش، مي سليم، صلاح عبد الله، ليلى أحمد زاهر، أحمد مجدي، وعدد آخر من الفنانين، وهو تأليف هبة الحسيني وإخراج حسن صالح.