بالفيديو - منة فضالي: "لا أقبل بالعنف الزوجي وسأردّ الصفعة بأضعافها"

القاهرة - "لها" 03 يونيو 2023

خلال حلولها ضيفة على برنامج "حكايتي" المذاع على منصة watchit، كشفت الفنانة منة فضالي عن ردة فعلها وقت تعرضها للعنف الزوجي، مؤكدة أنها اتخذت قرار الانفصال عن قناعة، موجهة نصيحة للسيدات بألا يتزوجن من شخص بخيل.

وقالت منة: "مش هنقول عنف زوجي ولكن مرة زمان مد إيده عليا ودي كانت صدمة انفصالي، وأنا بشوف الراجل اللي بيمد إيده على الست متخلف، ولو الموقف ده اتكرر دلوقتي كان هياخد القلم ده ثلاثة أو أربعة، أكتر حاجة بكرهها إن حد يمد إيده على وشي".

وذكرت أنها يمكن أن تتزوج شخصًا أقل منها على المستوى المادي، متابعة: "الراجل يعيبه جيبه ولسانه الطويل، ممكن أتجوز حد أقل من مستوايا المادي ولكن لحد معين.. أكيد مش هاخده أصرف عليه، مش هصرف على الكلاب والبيت وجوزي دي تبقى كارثة، ولازم يعرف يتعامل مع الأطفال".

وأشارت إلى أن والدتها لم تكن راضية عن هذا الزواج، كما أنها لا تقبل أن تكون زوجة ثانية.

وقالت: "الزواج كان تحدي لأن أمي مكانتش موافقة وأنا كنت واخداه عِند، ولكن البنات بتفهم المشاعر أكتر، ومش كل اللي بنحس بيه بجد، والحب بييجي في سن معينة، وأنا ضد اللي بيتجوزوا بدري وببقى واثقة إن علاقتهم هتفشل.

وعن قبولها أن تكون زوجة ثانية، علقت منة فضالي قائلة: "مينفعش أبدًا أبقى زوجة تانية أنا معنديش حاجة ناقصة علشان تخليني أبقى زوجة تانية، ممكن أكون زوجة تانية لو هو مُطلق أو مراته متوفاة".

ووجهت منة فضالي نصيحة للسيدات، قائلة: "نصيحتي للستات متتجوزيش راجل أكبر منك، ولا البخيل وعن تجربة، إنتي مش مجبرة تشتغلي أو تأكلي أو تضحكي علشان ترضي حد".

وأضافت: "أهم سلاح للست أنها متحسش نفسها قليلة والثقة والاعتزاز بالذات، وفي ستات ناجحة أكتر من الرجالة".

وأكدت أنها لا تلتفت للانتقادات، قائلة: "مش نجاح شخصية نرجس في جعفر العمدة، بس اللي بينلي نفسنة الناس، في ناس في الشغلانة متضايقين إني باخد الفُرص دي، وسمعت ناس بودني بتقول لأ دي لا تصلُح، ولكن أنا مهتمتش ولا برد".

وعن زيارتها للطبيب النفسي، قالت منة فضالي: "عمري ما روحت لدكتور نفسي إلا لو بسبب دور، ومفيش مانع أورح لدكتور لو تطلب إني أروح لدكتور نفسي مش عيب".

وأكدت منة فضالي أنها لم تتعرض للتحرش الجسدي في حياتها، قائلة: "عمري ما اتعرضت للتحرش ومحدش يقدر يجي ناحيتي أنا بلعب Kickboxing اللي يفكر يتحرش بيا هياخد أكبر بوكس في حياته، هما بيتحرشوا بيا لفظيًا بكلام مش لطيف، وساعات كنت برد".

كما أعربت عن عشقها للكلاب، معلقة: "الكلاب أحسن من البني آدمين في المعاملة، بيحبوني بجد من غير أي مقابل ومش عايزين مني حاجة، بيخافوا عليا وبيحسوا بيا.. الكلب وفي جدًا وأنا ملقتش بني آدم وفي".