بعد أيام قليلة من إعلانها عن مرورها بأزمة صحية، كشفت الفنانة ألفت عمر أنها كانت تفكر جدّياً بترك مجال الفن، بسبب عدم مشاركتها في أعمال فنية لتؤمّن احتياجاتها، لكنها ظلت صامدة في ظل الظروف التي مرت بها، مؤكدة أن فقدان العديد من أصدقائها الشباب أيضاً داخل الوسط الفن أثّر فيها سلباً.

وقالت ألفت: "أكيد لو أي حد في مكاني كان يمكن اتحسر على نفسه، أو يأس وساب الشغلانة دي من زمان، بسبب الشغل وموت أصحابنا الفنانين في عز شبابهم، من التعب في الشغل كل ده أثّر عليا جدًا".

وأضافت: "في بعض الفنانين بيقولوا اعتزلوا وهما لسه مخلصين بطولات من تلات شهور، فما بالك باللي ظروفه زيي أو أوحش مني، المهم أنا مستسلمتش بس أكيد زعلت جداً من ظروف الشغل. السنة كلها بتعدّي وأنت بتشتغل عمل واحد وجايز يكون متشاف أو لا بس الواحد بيعمل اللي عليه، وكنت فاكرة إني أزعل شوية وأقول خلاص وأهدّي نفسي ونفكر بشكل إيجابي إن الزعل خد وقته وخلص، ولكن للأسف اكتشفت إنه أتحول لمرض نتيجة الضغط العصبي من قلة الشغل أو من كثرة ساعات العمل والإرهاق وقلة النوم".

كما تحدثت ألفت عمر عن حالتها الصحية، بعد معاناتها مشاكل في الغدة الدرقية خلال الأيام الماضية، بسبب الضغوط العصبية التي تتعرض لها بسبب عملها في مجال الفن، وأنها تعاني منذ سنوات زيادة في الوزن، حيث قالت: "بقالي سنة جسمي بدأ يتخن وشي بيتنفخ لدرجة إن ناس كتير كانت بتقولي إنتي نفخة خدودك. لكن في السنة الأخيرة ظهرت عليّ أوي الأعراض، وهي الخنقة والعصبية واللخبطة، وبعد الفحوصات اتضح إن فيه غدة درقية، والكسل بيخلّي الحرق قليل، وبيعمل مية تحت الجلد".

وعن تطورات حالتها الصحية، قالت ألفت عمر: "دلوقتي ماشية على العلاج، وبعمل رياضة علشان جسمي يبدأ ياخد شكل طبيعي، وكنت بتعذب بقالي شوية لكن محدش يعرف، ولما كتبت حالتي على السوشيال، كان علشان لو حد عنده حاجة يلحقها".