خلال تقديمها برنامج "قعدة ستات" الذي يُعرض على شاشة "القاهرة اليوم"، اعتذرت الإعلامية مروة صبري الى جمهورها، بعد دعمها ومساندتها للفنانة ميرهان حسين، التي أعلنت أخيراً اعتزالها الفن بسبب تعرّضها لضغوط نفسية وعدم إيجاد فرصة عمل في الفن.

وقالت مروة: "أنا آسفة لنفسي إني صدّقت ميرهان حسين واضحك عليا أنا معرفهاش شخصياً... وصعب عليا إن حد يكون تحت ضغط نفسي، وأنا بحب ميرهان حسين كفنانة".

وأضافت: "الواحد لما بيبقى متضايق وواقع تحت ضغط نفسي ومش عايز... الموضوع مش بياخد أقل من شهر أو شهرين تلاتة... إحنا هنا بسم الله ما شاء الله لا سحر ولا شعوذة ميرهان حسين خرجت من الأزمة النفسية بعد حوالي أسبوع أو عشرة أيام".

وتابعت: "إمبارح فوجئت إنها طالعة في برنامج على الهوا وبتتكلم أنا يا جماعة معتزلتش الفن ولكن اعتزلت السوشيال ميديا... نعم أؤمري إنتي بتضحكي على مين؟! إنتي بتضحكي على الجمهور وبتلعبي بالجمهور... هو أعتزل وأرجع بقت لعبة... أنا مبحكمش على حد بس أنا كنت مقتنعة أوي وجاية أدافع عنها... والناس كتير قالتلي إنتي بتدافعي عنها كده ليه وقالولي إنها بتاخد ترند، قولتلهم مين قالكم إنها بتركب الترند ومستحيل تعمل كده... وهي فنانة واعية وقدوة لناس كتير".

واستطردت مروة بالقول: "والفكرة إن ترند مكمّلش أسبوع أو عشرة أيام ترند فاشل... ترند مش متصدّق ومينفعش، أنتم فنانين مينفعش تحطوا نفسكم في الحته دي، تلعبي بمشاعر الجمهور واللي بتعلي نسب المشاهدة وبتقلل نسب المشاهدة... بعتذر مرة تانية إني صدقت ميرهان حسين... طبعا إنتي حرة في قراراتك، ولكن مش حرة إنك تجرحي فنانين زمايلك، ومش حرة تشككي في نجاح غيرك وكل حد بيشوف نفسه أحسن واحد في الدنيا".

واختتمت مروة صبري حديثها بالقول: "مينفعش تطلعي تعملي كل ده وبعدها بأسبوع تطلعي تقولي أنا معتزلتش الفن ده أنا اعتزلت السوشيال ميديا... هي السوشيال ميديا جت جنبك في حاجة؟ هي السوشيال ميديا سواء فتحها أو قفلها حد جه طلب منك حاجة... صدقيني كل اللي عملتيه إنك ضحكتي الناس عليكي دخلتي في حته عدم المصداقية عند الناس... من فنانة كيوت في حالة متعددة المواهب لواحدة فقدت مصداقيتها عند الناس".