ألفت عمر تتحدث عن أسباب قلّة أعمالها وأزماتها الشخصية

كشفت الفنانة ألفت عمر أن من أسباب قلّة ظهورها في الأعمال الفنية، تعرّضها لبعض الأزمات في حياتها الشخصية، وانتشار شائعات اعتزالها الفن في فترة تألقها.

وقالت ألفت: "كان الأول كسل مني وحياتي الشخصية كان فيها مشاكل كتير ولكن بقيت مركّزة في شغلي، والدنيا كلها اتغيرت وشركات الإنتاج، وناس كتير قالوا عليا إني سافرت برا مصر ومش هرجع، وناس قالوا إني سيبت الشغلانة خالص، وكان في مخرجين كتير طلبوني في الوقت ده وفكروا إني اعتزلت... ولكن الحمد لله عملت صدى حلو، ولكن علاقاتي وتواجدي في الوسط الفني مش زي الأول".

وأضافت: "الأزمات اللي واجهتني بقالها مدة كبيرة ويمكن عدم اكتمال بعض الأعمال اللي كنت هشتغلها واتأجلت عملت لي حالة نفسية خاصة في رمضان ده واللي قبله مكنش ليا أدوار كبيرة في الشغل".

واختتمت ألفت عمر حديثها بالقول: "حسيت إن أتأخرت عليا فكرة الفرصة الحلوة يمكن من الضغوط بتاعة فترة الشغل والتصوير وغياب الأعمال كنت هشتغلها ومعبرتش عن حالتي النفسية بأي شكل من الأشكال، الصعوبات بتاعة الشغلانة دمها تقيل، خاصة ممكن نشوف حد بيقول هيعتزل عشان مفيش شغل وهو لسة عامل بطولة، والواحد لو فكر زي الناس دي كان زمانه ميت، ولكني الحمد لله بفكر بشكل إيجابي دلوقتي".