بعدما أعلنت عن تعرضها لوعكة صحية شديدة، نُقلت على أثرها إلى المستشفى، كشفت الفنانة إنجي خطاب تفاصيل حالتها الصحية، حيث قالت: "منتظرة نتيجة التحاليل والأشعة، اللي حصلي إني فجأة وقعت وجالي حاجة زي تنميل في دراعي وحرقان في منطقة الصدر".

وأضافت: "كلها أعراض قلب، والدكاترة في الأول شكوا إنها جلطة وفجأة وقعت، وقعدت أقاوح عشر دقائق، وأقول ممكن تكون أعراض عابرة، بس مقدرتش ونديت على أختي وكنت دايخة جداً واتهبدت على الأرض... حجزوني في المستشفى وعملولي جلسات أوكسجين ومحاليل لأن الحالة اللي كنت فيها نزلت الضغط خالص فبدأوا يدّوني حاجات تعمل سيولة في الدم عشان الجلطات متتكونش".

وأردفت بالقول: "دراعاتي من كتر الشكشكة مش قادرة وعملنا تحاليل وإشاعات كتير، ولحد دلوقتي منعرفش ده بسبب إيه لأن كل الإشاعات اللي فاتت بتقول مفيش حاجة، فمنتظرين نتيجة الإشاعة الدقيقة اللي على الشريان وهتحدد سبب كل ده إيه".

وكانت إنجي خطاب قد أعلنت تعرضها لوعكة صحية، من خلال صورة نشرتها عبر حسابها في "إنستغرام" وظهرت فيها خلال إجرائها تحاليل في المستشفى، وعلّقت عليها بالقول:" ممكن تدعولي بالشفاء العاجل، الدعاء يغير القدر، بمر بأزمة صحية صعبة وبعمل فحوصات وأشعة وتحاليل على القلب، دعواتكم ليا بالشفاء العاجل اللهم شفاء لا يغادر سقمًا يا رب، الحمد لله على كل حال يا رب".