خلال لقائها في برنامج "الراديو بيضحك" الذي تقدّمه الإعلامية فاطمة مصطفى عبر الراديو 9090، أكدت النجمة نيللي كريم أن لا خلافات بينها وبين صنّاع فيلم "ع الزيرو"، كما تردّد منذ إقامة العروض الخاصة للفيلم، التي غابت عنها.

وقالت نيللي: "مفيش عندي تعليق غير إني كنت سعيدة بالشغل مع المخرج ماندو العدل ومحمد رمضان، لكن بالنسبالي كورق ودور اعتبريني ضيفة شرف في الفيلم". وأضافت: ""ع الزيرو" فيلم محمد رمضان والطفل منذر مهران، ورحلتهم هي رحلة الفيلم... ناس كتير اتكلمت في حاجات كتيرة، أنا مفيش عندي مشاكل مع حد، لكن عندي اختلافات في وجهات النظر كممثلة".

وأكملت: "دايماً شركات الإنتاج مفيش عندنا إدارة ممثل، محدش قلبه على الممثل إزاي يطلعه بأحسن شكل، وأعمل له أحسن حاجة، وكل منتج همه على المشروع ككل، ولو مخططتيش لنفسك عايزة تعملي إيه محدش هيعملك ده".

وعن مشاركتها في موسم رمضان 2024، قالت نيللي كريم: "أنا الحقيقة بقالي فترة عايزة أريح لإني تعبت، كل رمضان تدخلي تشتغلي أربعة شهور، ويمكن السنة دي كان الدور كورق أقل بكثير... المسلسل اللي قبله "فاتن أمل حربي" كان الدور من الجلدة للجلدة، وأيام الراحة اللي أخذتها كانت قليلة أوي... السنة دي إن شاء الله هعمل مسلسل كوميدي وحابة أفرّح الناس. أنا تعبت من الدراما الثقيلة وتعبتني نفسياً وزهقت".

كما أوضحت أنها تخطّط لتقديم أعمال سينمائية بالقول: "عايزة أركز في السينما، يمكن أنا مقصّرة في السينما من فترة وهي وحشتني".

وعن علاقة مسلسل "ليه لأ" بتفاصيل حياتها الشخصية، قالت نيللي: "المسلسل ملوش علاقة بحياتي طبعاً، هي قصة كتبتها مريم نعوم وأخرجتها نادين خان، ومن التجارب الحلوة اللي عدّت عليا السنة دي". وأضافت: "المسلسل كان مهم لستات كتير، وتناول تربية الأولاد، وإزاي الست بعد الطلاق لما تكون مخلّفة المجتمع لا يعطيها الحق تتجوز وتعيش حياتها، وينتظر منها تدّي حياتها لأولادها، في مقابل إن الأب له حق يتجوز ويخلّف ويعيش حياته عادي. علاقة الولد بأمه أكثر نقطة الناس ركزت فيها، وللأسف قابلت بنات كتيرة قالوا حصل لهم نفس الموقف، ومكانش المقصود أعملها قضية، لكن القصة لو مكتوبة حلو الناس بتطلّع منها قضية معينة".

وعن المشاريع السينمائية التي تنشغل في تحضيراتها، قالت نيللي كريم: "عندي فيلم "برشامة" من إخراج خالد دياب، كان المفروض ندخله من شهر لكن أجلّناه، وعندي فيلم اسمه "أناناسة" لو ملحقتش أدخله قبل رمضان يبقى بعد رمضان".

ورداً على سؤال حول مشاركتها في الجزء الثالث من فيلم "الفيل الأزرق 3"، قالت نيللي كريم: "أنا سمعت من فترة عن "الفيل الأزرق" الجزء الثالث لكن مفيش عندي معلومة عن جدية الموضوع".