أحمد جمال يوجه رسالة للشباب بعد أحداث ضرب طابا ونويبع

وجه المطرب أحمد جمال، عبر حسابه بموقع X (تويتر سابقًا)، رسالة للشباب تعليقًا على سقوط صاروخ على طابا، وضرب مركز إسعاف في نويبع، ومحاولات جر مصر للدخول في حرب في ظل الظروف الاقتصادية الحالية.

وكتب جمال قائلاً: كلمة للشباب الصغير اللي أنا حاسس بيه ومتفهم الحماس اللي عنده تجاه اللي بيحصل في غزة ومن متابعتي لكل البوستات والاقتراحات والآراء الكتير أوي دي عايز أقولكم، إحنا عندنا جيش وطني مخلص فاهم كويس أوي ودارس المخطط اللي نفسهم يحققوه من زمان وعارف إن الاستفزاز المتكرر وجر رجلنا للحرب ده عشان يخلص على اقتصادك ويستغل الظروف الصعبة اللي إحنا فيها دلوقتي، إوعى تفكر أن قيادات جيشك مش فاهمين المخطط، إوعى تفكر إنهم مستنيين البوست بتاعك بتاع افتح الحدود واضرب ورد وادخل حارب دلوقتي".

وأضاف: "بالعكس هو بيتعامل بحكمة وبعقل عشان اللي فشلوا يحققوه بـ(سد النهضة) من تحت و(داعش وليبيا) من الغرب و( إرهاب وداعش سيناء) من فوق و(تفجير كنايس ومساجد) و(الفتنة الطائفية) قبلهم من الداخل وغيرها وغيرها من المخططات، أنت هتنجحهم إنهم يستنفدوك في حرب هما دلوقتي بيفرضوها عليك ومش بس هما ده أمريكا وحلفاءها، ساعتها هيبقوا بيحاربوا ضدك أنت مش هتحارب إسرائيل لوحدها".

وأضاف: "اللي عايز أقوله إن قرار الحرب قرار كبير وإذا مكنش برغبتك وفي التوقيت اللي أنت تحدده مش هما هتبقى الخساير أكبر بكتير.. ثق في جيشك - ثق في قيادتك - خليك في ضهر بلدك وحبها زي ما بتحب الخير لجيرانك وقبل كل ده ثق في ربنا اللي حامي مصر وحامينا من كل اللي فات، معقول مش هيحمينا من كل اللي جاي؟".