نشر الفنان والملحن عصام كاريكا عبر حسابه الخاص في تطبيق "تيك توك" مقطع فيديو كشف من خلاله عن كواليس تلحينه أغنية "ياللي نسيت الغرام" للفنان محمد سعد في فيلم "بوحة"، وسر خلافه معه.

وقال كاريكا إن الأغنية كانت في بداية الأمر لمطربة من المنصورة، وبعد سماعها الأغنية أُعجبت بها كثيراً ودفعت عربونها، لكنه فوجئ بعد يومين بخطيبها يهاتفه ويخبره بأن المطربة لن تستمر في الغناء، مطالباً باسترداد العربون، فوافق.

وأضاف: "في الوقت ده كنت بعمل مسرحية "شبورة" ومحمد سعد بيعمل مشهد بصوت أطاطا وسمع الأغنية في الاستوديو وقالي حلوة، وفي الوقت ده عملت لمحمد سعد كمان أغاني فيلم "55 إسعاف" وفيلم "اللمبي" وفيلم "اللي بالي بالك"، ولما جينا نعمل فيلم "بوحة" شرحلي المشهد، وطلب مني الأغنية اللي سمعها لما كان عندي في الاستوديو وقت مسرحية "شبورة"، وطلب كمان يتكتب موال في البداية".

وأردف كاريكا بالقول: "فكتب الشاعر الراحل سمير زكي موال "ياللي نسيت الغرام... ارجع هنا وقولي"، وبعدها كلّمتني مي عز الدين وقالتلي إن اسمها "كوتة" في الفيلم وطلبت نضيف اسمها في الأغنية، ولكن واحنا في الاستوديو اختلفنا، وده اللي ضايقني وزعّلني، الأغنية فيها قافية وكان عايز يشيل جملة "تحت السلم بنام" وقالي محمد سعد مش عجباني وعايز كلمة "سجادة بين إيديك"، ولو اتغيرت يبقى لازم هنغير القافية، فكلمت المنتج وائل عبد الله، وقالي معلش عشان خاطري مشّيهالي... وائل بعتبره أخ وصديق، وكنت قاعد في الاستوديو قلبي بيتقطع، رغم إني كنت ناجح وقتها وعملت شكل كتير مع نجوم كبار الوقت ده، ولكن جيت على نفسي، ومشيتها "سجادة بين إيديك"، ونجحت الأغنية نجاح غير طبيعي لما غنّاها من فترة كورال "روح الشرق"".

وعبّر عصام كاريكا عن حزنه لسرقة مطربي مهرجانات لحن الأغنية، قائلاً: "قلبي اتقتل مرة تانية لما لقيت جماعة بتوع المهرجانات اللي مش بيسيبوا أي حد في حاله وياخدوا اللحن ويحطوا أي كلام ومش مهم مين لحنها، وأخدوا لحن الأغنية ومحدش كلمني، بعد اللي حصل ده أقول إيه؟ لا إله إلا الله".

لمشاهدة الفيديو إضغط هنا