في مداخلة هاتفية مع برنامج "مصر جديدة"، الذي تقدّمه الإعلامية إنجي أنور عبر قناة ETC، هاجم المخرج خالد يوسف، الناقد الفني طارق الشناوي، بسبب نقد الأخير لفيلم "الإسكندراني" من بطولة الفنان أحمد العوضي، والذي تحدث فيه عن رؤية خالد يوسف والتغييرات التي أدخلها على رواية الراحل أسامة أنور عكاشة، وأن خالد "بيتشعبط" في عكاشة لإنجاح الفيلم.

وقال خالد يوسف في مواجهة دارت بينه وبين طارق الشناوي على الهواء: "أنا التزمت برؤيتي وأسامة أنور عكاشة مواقفه متفقة تماماً مع مواقفي، هو راجل ناصري وثوابته الوطنية زيي ورؤيته في الحياة ومواقفه مشابهة جداً لمواقفي، علشان كده مكنش غريب عليا إني أتبنى رؤيته وأقدّم فيلم "الإسكندراني" بنفس رؤيته، أنا بعتز إني قدّمته بروح أسامة أنور عكاشة برغم إنك لو قرأت السيناريو الـ180 صفحة يا أستاذ طارق هتعرف حجم التغيرات المذهلة اللي أنا عملتها مع الحفاظ على روح أسامة أنور عكاشة".

ووجّه خالد يوسف رسالة شديدة اللهجة الى الناقد طارق الشناوي، قال فيها: "أنا مبحبش الكلام اللي يتعمل عناوين والناس تصدّقه، أنا أقدر أقول عنوان يقطم الرقبة، يعني فكرة محاولة الشعبطة على أسامة أنور عكاشة، زي ما حاولت أتشعبط على يوسف شاهين وكتبت زمان، أنا مابتشعبطش على حد يا طارق أنا طول عمري ناجح الحمد لله، أنت بتتكلم على 13 فيلم أنت نفسك قايل في مقالتك فيلمين مجابوش إيرادات، يعني بنسبة أكثر من 80% أفلامي ناجحة ورائجة وبتدخل مهرجانات وبتنجح، فأنا مابتشعبطش على نجاح حد ولكن يشرّفني أعمل عمل لأسامة أنور عكاشة".

ومن جانبه، ردّ طارق الشناوي على حديث المخرج خالد يوسف، قائلاً: "الفيلم السينمائي يدافع عن نفسه مش المخرج اللي يدافع عنه، المخرج يعتبر أن الدفاع عن الفيلم قضيته وأنا نجم وأنا محصلتش وأنا اللي كسّرت الدنيا وتاريخي وجغرافيتي لأ، الفيلم فيه مشاكل كتير، النهاردة حتى على مستوى الرقم ليس هو الأعلى، والواقع بيقول لما تنزل فيلم جديد لازم اللي قبله يتراجع، ورد عليه خالد والإيرادات بتهكم برضه جزء من النقد العلمي ورد طارق بعيد عن الأرقام أنا مش فاهم يعني العوضي اختفى في الفيلم 10 سنين، شوفي صورته قبل 10 سنين وبعد 10 سنين لم يحدث أي تغيير في الزمن ودي مسؤولية المخرج".

وردّ المخرج خالد يوسف على الناقد طارق الشناوي قائلاً: "أجيبلك صورتك أنت شخصياً في منتصف العشرينات والتلاتينات مش هتلاقي فرق"، مؤكداً أن نقده نابع من كراهيته له، بالقول: "أنا مبدافعش عن فيلمي، أنا بتكلم عن العناوين اللي أنت بتحطها، أنت بتقول بيتشعبط ودي كلمة مُهينة وأنا رديت عليها، النقد يا طارق ضلع من أضلاع الإبداع، مثلث الإبداع هو مبدع وجمهور وناقد، دي مسألة أنا مُسلّم بيها، لما ألاقي حالة نقدية علمية قدامي هحترمها لو ماسكة الفيلم مشرداه، لكن الانطباعات الصحفية اللي أنت بتقدمها للناس على إنها نقد وفاكر إني لا أجرؤ أرد عليها... لأ هرد عليها يا طارق وهقولك دي انطباعات صحفية بتنم عن فكرة كراهية خالد يوسف لأني قولت عليك أنت مش ناقد أنت بتكتب انطباعات صحفية".