طفلة "الكبير أوي" وزوجها يرويان قصة حبهما وسبب زواجهما في سن صغيرة

كشفت الفنانة ليلة عدنان، الشهيرة بـ"طفلة الكبير أوي" وزوجها الفنان عمرو أسامة، عن قصة حبهما، وسبب زواجهما في سن صغيرة والذي تم منذ ثلاثة أشهر.

وقالت ليلة عدنان: "كنا مع بعض في المدرسة، وكنت مشاركة في مسلسل الكبير أوي، فكان بيرخم عليا، وكلهم في المدرسة كانوا بيرخموا عليا علشان كانوا شايفني رخمة وأنا كنت لمضة ومش بسيب حقي، لكن عمري ما عشت في الدور ولا كنت تنكة وساعات بنسى إني ممثلة، وعمري ما ركزت في الموضوع ده".

من ناحيته، قال عمرو أسامة: "أنا أكبر منها بخمس سنين والمدرسة اللي كنا فيها مقسومة نصين وكنت لما بشوفها بهزر وأرخم عليها، وهي كان دمها خفيف جدًا، ودي من الحاجات الغريبة لأن معظم الناس بيقولوا إن اللي شكله حلو دمه تقيل".

وأضاف: "أنا اعترفت لها بحبي الأول، لكني مش من الأشخاص اللي بقول الحاجة مباشرة، ولكن الموضوع جه بالتدريج وكنت بقول لها ما تخرجيش من غيري وبتخرجي مع مين وأسئلة من النوعية دي".

وعن إقناعها بالزواج وهي بسن صغيرة قال: "ده مش عيب، أنا عندي صحابي أصغر مني متجوزين، وهي عندها صحابها أصغر منها متجوزين، وإحنا نعرف بعض بقالنا عشر سنين".

وعن الانطباع الذي أخذه كل شخص عن الآخر في البداية قالت ليلة: "أنا مكنتش شايفة إنه مناسب، لأنه كان ليه صحاب بنات كتير وبيخرجوا، وأنا كنت من التمرين للتصوير للبيت للنادي، وهو كان بيخرج كتير".

من ناحيته قال عمرو: "من أول ما شفتها مع الوقت كنت شايفها طيبة وكويسة وكنت متمسك بيها وكنت شايف إنها أنسب واحدة ليا، ومن وقت الخطوبة لحد دلوقتي الموضوع اختلف وبقيت في حتة تانية لأني ما كنتش بدي اهتمام للشغل وهي بتشجعني في الشغل ومعايا في قرارات وحاجات كتير وشجعتني أنجح في شغلي وحياتي الشخصية وغيرت تفكيري".

شارك