خلال حلولها ضيفةً على برنامج "العرافة"، الذي تقدّمه الإعلامية بسمة وهبة على قناة "النهار"، فتحت المطربة بوسي النار على المطرب الشعبي سعد الصغير، بسبب تصريحاته حول مساعدته لوالدها الراحل، وأبدت استياءها الشديد مما قاله، وطلبت منه عدم الحديث عنها مرة أخرى.

وقالت بوسي: "أول مرة أشوف راجل كده، وأنا متقارنش بيه ومعرفش اللي بيعمله ده غيرة ولا إيه، وهو عايز مني إيه ولا ده لمصلحة مين ولا بتعمل أي بروباغندا علشان الناس تاخد بالها منك، ليه ما بتصدّق أي حد يقول حاجة تقوم فارش الملاية؟".

وأضافت: "هو أنا مستنية حد يعمل اللي قال عليه ده لأبويا؟ هو لما حد يجيبلي أنتريه ولا ثلاجة ولا بوتاغاز بـ50 ولا 60 ألف جنيه مش هعرف أعمل ده؟ أنا ياما عملت كتير وإخواتي عارفين، وأخويا اللي جاب أبويا يقعده في شقة أمي لأنه مبيدفعش الإيجار، وأنا عمري ما قصرت مع أبويا... كانوا بيستغلوا أبويا ضدي، وبيروحوا يدوا له فلوس ويخلوه يتكلم علشان يحاربوني بيه، وهو كان طمّاع وعايز فلوس، وكان بيقولي أخوكي مبيوصليش الفلوس، هو في أكتر من أنه أكون لسه بعتاله فلوس ألاقيه تاني يوم يطلع يقول إني مبردّش عليه ورامياه؟ إمتى رميته؟ وأنا منعت عنه الفلوس وقتها لأني معملتش فيه حاجة وحشة، وهو اللي عمل".

واختتمت بوسي حديثها بالقول: "سعد الصغير قالي أنا هروح أصوّر مع أبوكي، قولتله بعد إذنك متدخلش نفسك في حاجة زي دي، قالي لأ ده أنا هصالحكم، قولتله مين قالك إننا زعلانين؟ وكان عايز يركب التريند على قفايا، وممكن يكون حد زقّه عليا، وأنا مستبعدش عن سعد أي حاجة، اللي ياخد شقة مرات أخوه المتوفي وياخد شقاها ودهبها ويديه لواحدة تانية مكنتش على ذمته وقتها".