خلال مداخلة هاتفية مع برنامج "أسرار النجوم" الذي تقدّمه الإعلامية إنجي علي عبر إذاعة "نجوم إف إم"، كشفت الفنانة سلمى أبو ضيف عن سعادتها بردود فعل الجمهور، بعد عرض أولى حلقات مسلسل أعلى نسبة مشاهدة، حيث أشارت إلى أن المسلسل يسلّط الضوء على حياة الناس البسطاء الذين يلجأون إلى الـ"تيك توك"، بسبب الظروف المعيشية الصعبة.

وتحدثت سلمى عن أصعب التحديات التي واجهتها في المسلسل، قائلةً: "المسلسل كله كان صعب وكنا بنهتم بالتفاصيل العميقة، وحياة شيماء مش سهلة إطلاقاً، هي بتصحى كل يوم مش عارفة التريند والدنيا هتاخدها فين، ودا بيولّد عندها إرهاق جسدي ونفسي، دائماً".

وأضافت: "فيه ناس الظروف بتحطّها في مواقف أكبر منها، وبتخلّيها مش عارفة تتصرف إزاي، بالذات لما بيبقى في عدم وعي وخبرة، وخصوصاً لو الشخص محتاج فلوس، فبيبدأ يشوف أي فرصة".

واختتمت سلمى أبو ضيف بالقول: "الناس مبقتش حاسة ببعضها ولا بتهتم بمشاعر أي شخص، وفي ناس بيكون عندها مصايب في حياتها، وكل اللي طالبينه إنهم ياكلوا ويسترزقوا، ومش بيلاقوا كمان ده للأسف، وفي ناس كتيره كده، وأنا تعاطفت مع شيماء، رغم أني مكنتش مهتمة بالتيك توك، بس لما لقيت في ناس فاتحة بيوتها من التيك توك، وعارضين حياتهم 24 ساعة للناس من أجل كسب العيش، وفيه منهم بيكسب حب الناس".

مسلسل "أعلى نسبة مشاهدة"، يناقش أزمة التيك توكر واليوتيوبر وتصدّرهم المشهد في الفترة الأخيرة.