بالفيديو - مها أحمد تروي تفاصيل خلافها مع السقا وكرارة ومقاضاتها لهذا الممثل!

تواصل الفنانة مها أحمد في الجزء الثاني من لقائها ببرنامج "أسرار" مع الإعلامية أميرة بدر المذاع على قناة النهار، كشف العديد من أسرار حياتها الشخصية والعملية وعلاقتها مع زملائها، وتتحدث عن خلافها مع الفنانين أحمد السقا وأمير كرارة، مؤكدة أنها أقامت أربع دعوى قضائية ضد الفنان فادي خفاجة بعد أزمتهما الشهيرة، كما تحدثت عن استهزاء زميل بها، بسبب مطالبتها بأداء دور في عمل فني، وفي السطور التالية اهم تصريحات مها أحمد في البرنامج.

وقالت: "معنديش الجرأة أذكر الزميل اللي قالي هتشحتي دور لأنه مايستاهلش، وكان أكتر واحد بيتنا مفتوح له، وبياكل معانا عيش وملح، وكان بيعمل فيلم قلتله الأقربون أولى بالمعروف، قالي هو أنتي هتربطي على عينك وتشحتي، هو الجري على أكل العيش غلط أو شحاتة".

وأضافت: "الغضب مخسرنيش أحمد السقا وأمير كرارة، ومقصدش أزعل أحمد وأمير، وساعتها مقللتش منهم، والسقا أخويا ولو شاف حاجة معجبتوش فيا بيقولي، لكني غلط إني عاتبت على السوشيال ميديا".

وتابعت: "لم أكن على دراية بقوة وجبروت السوشيال ميديا وموضوع التريند، وكنت بعيدة عن السوشيال ميديا، ولما لقيت الناس عاملة أكونتات فيك قلت أعمل أكونت خاص ليا، وقلت أقعد أفضفض مع نفسي عالسوشيال، نمت صحيت لقيت الدنيا مقلوبة عليا، واكتشفت إن في ناس في السوشيال بتكرهك أكتر ما بتحبك.

وعن خلافها مع النجوم قالت: "معملتش حاجة تستاهل إني أعتذر لكرارة والسقا، ومجدي عاتبني وقالي كنتي قلتيلي أو فضفضتي معايا الأول، وكان ممكن أشيل البوست اللي عملته، لكن لقيت في توابع فيها تطاول، فقلت مش هشيله".

وأضافت: "كل الفنانيين كانوا محايدين حتى النقابة، في فنانات ومذيعات مرتزقة كتبوا شكر للسقا وكرارة، على أساس إني بنت البطة السودة".

ولفتت إلى أنه رغم كل الخلاف "اللي فرق معايا ثلاثة أشخاص، واحدة قعدت تشكر في المسلسل وبعدها كلمتني، والتانية معروف إنها صاحبتي وفجأة لقيتها كاتبة بوست طويل عريض بتشكر في تربيتهم، والناس في الكومنتات بتقلها طب وصاحبتك؟، وأنا معاتبش حد بالعكس هسيبه على عماه".

وتابعت: "عندي شهوة للستر إن أي حد يقول عليا حاجة وحشة أو حاجة مش فيا وأنا ناجحة".

وأشارت إلى أنها "أقمت أربع دعاوى قضائية ضد فادي خفاجة، منها سب وقذف وتحرش، وهرفع قضية على منصة التيك توك، وهي مضمونة وأكسبها وأنا مغمضة لأنه حقي وعندنا قانون وقضاء عادل هيجيبلي حقي بالقانون".

وختمت حوارها: "مؤمنة جدًا بالحسد وبحب ألبس حاجة زرقا عشان تحميني من الحسد وبقرأ قرآن قبل ما طلع لايف وأثناء اللايف، لأن معظم الفنانين قاعدين بيتفرجوا عليا ويحسدوني على الريتش بتاعي".

شارك