خلال حلوله ضيفًا على الإعلامي عمرو أديب في برنامج «BIG TIME PODCAST»، كشف الفنان محمد حماقي، عن العديد من التفاصيل حول حياته الشخصية والعملية، حيث تحدث عن أول لقاء له مع زوجته، وتفاصيل ولادة ابنته فاطمة وعلاقته بها، ورأيه في الانتقادات التي توجه له، وفي السطور التالية أبرز تصريحات حماقي في البرنامج.

- الفنان حساس ومرهف وأقل حاجة بضايقه، ففكرة إنك أبديت الرأي بالشكل السيئ ده بتضايق، وعمرنا ما كنا كده.

- الشعب العربي عاطفي وتحكمه مشاعره فلما مشاعرك تسبقك لازم تقدر قيمتها وخطورتها، أنا بشوف حاجات مبصدقهاش، وأنا مش ببصش على الآراء والتعليقات السلبية.

- أنا لا أحب النقد ولا أكون مبسوط لما حد ينتقدني، والنقد بيضايقني لأن بحس إن في حاجة ناقصة.

- فاطمة أحلى حاجة حصلت في حياتي، وكنت قبل ما أخلف دايمًا أسمع إن أقوى حب هو حب الأب والأم لولادهم، لكن عمري ما تخيلت الإحساس، وهو فعلا أقوى من إنه يتوصف.

- حضرت الولادة وأول ما طلعت ومسكتها حسيت إن شريان جديد اتفتح، أو زرار مشاعر عمرها ما كانت موجودة، إنت بتحب نفسك إلا قدام بنتك أو ابنك.

- علاقتي بيها غريبة وتطورها غير طبيعي، ودلوقتي عندنا علاقة قوية وبتعمل حاجات كتير من اللي بحبها، بتلعب كورة وأهلاوية.

- أنا كنت زملكاوي، وأخويا زملكاوي، وأمي زملكاوية أكثر منك وبعنف.

- يوم ما الزمالك كسب بيراميدز بثلاثة أهداف، أمي كلمتني وقالت اللي خايف يروح والمدرسة فتحت مرة ثانية، فقلت لها الاختبار الحقيقي ماتش السوبر بعدها بين الأهلي والزمالك.

- أكبر مشكلة عند الزملكاوية إن أي حاجة يعملها الأهلي يقولوا عليها حظ.

- شعرت بإعجاب وارتياح من نوع خاص في أول لقاء جمعني بزوجتي، وسعيت بعد ذلك لمعرفتها أكثر.

- هي كانت مصممة أزياء، وفي 2010 عملت افتتاح مجموعة أزياء في فيلا جدها حسن درة في الزمالك، وأنا حضرت وتعرفت عليها وكانت والدتها موجودة بالصدفة.

- كان في حاجة زيادة عن الإعجاب العادي، إحساس مريح وإني عايز أشوفها مرة ثانية وأعرفها أكثر.

- تعرفت في نفس اليوم على زوج أختها الكبيرة وكلمته هو الأول، لأني طالما دخلت البيت وتعرفت على أهلها مينفعش أحاول أجيب رقمها وأكلمها من وراهم.

- نهلة ذوقها كويس في المزيكا طول عمرها وكانت بتلعب بيانو، وأنا يهمني رأي حد ذوقه حلو في المزيكا أكثر من رأي المتخصصين.