أمينة خليل تتحدث عن التنمّر ومواصفات فتى أحلامها

في حوارها ضمن برنامج "أسرار النجوم" الذي تقدّمه الإعلامية إنجي علي عبر محطة نجوم FM، تحدثت الفنانة أمينة خليل عن تأثير عملها كفنانة في حياتها الشخصية والعاطفية، وكشفت عن المواصفات التي تتمنى توافرها في شريك حياتها المستقبلي، وتأثير التنمّر فيها.

وقالت أمينة: "ساعات كنت بتكسف زمان من شغلي وبحس إن لأ متنجحيش أوي كده علشان شريك الحياة ميتكسفش وميحسش إني ناجحة عنه، وبالتالي بدأت تبقى مشكلة عندي وأنا السبب فيها، مفيش حد يستاهل إني أهدم نجاحي علشانه، أنا لازم أكون واثقة في نفسي وإن الشخص اللي هحبه يحبني بكل ما فيا وبنجاحي، وهيبقى واثق من نفسه إن نجاحي مش هيهزه ويبقى فخور بيا".

وعن مواصفات شريك حياتها المستقبلي، قالت: "طبيعي أقول حاجات كلاسيك زي أنه ميكونش بيكدب ولا يخون، ولكن مبحبش الراجل اللي مش طموح، تخيلي إني طول النهار بطلع بحاجات نفسي أعملها وبجري على أحلامي وبحاول أحققها، وبتكلم مع راجل بلا طموح هحس إننا مختلفين، ولو الشخص طموح وبيجري ورا أحلامه بيحببني فيه"، مؤكدةً أنها ستختار الفن إذا خيّرها شريك حياتها بينه وبين الفن، والحالة الوحيدة التي قد تتخلى فيها عن الفن هي التفرّغ لأمومتها.

وعن التنمّر في حياتها، قالت أمينة إنه قضية مهمة تهتم بها على المستوى الشخصي، وتتعرّض لها وتتمنى مناقشتها في أحد أعمالها الفنية. وأضافت: "نفسي أناقش موضوع التنمّر، وحاسة إنه موضوع مهم ومنتشر، ولم تتم مناقشته كفاية، وعندنا سلاح اسمه السينما والمسلسلات والفن لازم نستخدمه بأقصى الطرق، ونتكلم في مواضيع بتحصل في المجتمع دلوقتي حالاً".

وأردفت بالقول: "مش تنمّر على شخص معين، التنمّر بشكل عام بداية من الأطفال في المدارس لغاية التنمّر في مكان العمل وعلى السوشيال ميديا، وتأثير التنمّر على الأشخاص بعد تعرّضهم له. أنا سمعت من كذا سنة قصة عن بنت كانت في مدرسة لغات، وانتحرت بسبب التنمّر، ودي قضية مهمة وبتحصل معايا أنا شخصياً ومع ناس كتير حواليا".

استمتعي بصيف أجمل مع مستحضرات essence الأساسية!