كريم محمود عبدالعزيز يتحدث عن الاكتئاب وذكرياته مع والده ولقائه بأحمد زكي (فيديو)

22 أيار 2025 | القاهرة - "لها"

كريم محمود عبد العزيز

خلال بودكاست "فضفضت أوي"، الذي يقدّمه المخرج معتز التوني عبر إحدى المنصات الرقمية، كشف الفنان كريم محمود عبد العزيز عن أسباب إصابته بالاكتئاب، كما تحدّث عن ذكريات عمله مع والده للمرة الأولى، ولقائه بالفنان الراحل أحمد زكي.

وحكى كريم موقفاً جمعه مع السيناريست وحيد حامد، مشيراً الى أنه أخرجه من اكتئابه بعد عرض مسلسل "هوجان" مع محمد إمام. إذ قال: "وقت عرض مسلسل "هوجان" نجح جداً، بس أنا دخلت في حالة محستش بنجاحه وداخل في ضلمة، صحيت لقيت رقم غريب مكلّمني وعرفت إنه وحيد حامد".

وأضاف: "قلت أكيد وحيد حامد متلخبط ويقصد يكلّم كريم عبد العزيز، وقاللي عايز أعملّك فيلم، بعدها فوقت وحسّيت بنجاح المسلسل وهو لحّقني من الاكتئاب، بس للأسف ملحقناش ننفذ الفيلم اللي كلّمني عليه عشان كان بدأ يتعب".

وعن ذكرياته مع أسرته، قال كريم محمود عبد العزيز: "والدي وأمي مضربونيش وأنا صغير عشان كده طلعت سوي، واتعملي استدعاء ولي أمر مرة في حياتي وزوغت في ثانوية عامة".

وكشف كريم عن المرة الوحيدة التي جلس فيها مع النجوم الكبار، لافتاً الى أنه لا ينسى جلوسه مع الكبيرين محمود عبد العزيز وأحمد زكي، حيث قال: "كان يوم محفور بالنسبة لي لما قعدت مع محمود عبد العزيز وأحمد زكي، وكنت أعرف شخصية والدي الطفولية، ولكني اندهشت من شخصية أحمد زكي البعيدة كل البعد عن كل أدواره التمثيلية".

وأضاف: "قضيت يوم مع محمود عبد العزيز وأحمد زكي، ورأيت كم المزاح والتهريج غير العادي والطبيعي منهما، أبي فعلاً كان طفل في حياته باستثناء بعض لحظات العصبية أو الانفعال، أما أحمد زكي فلقيته شخص طيب، وإحنا قاعدين قاللي الإمبراطور والنبي يا كريم خد مفتاح العربية وعايزك تجيب لي حاجة منها فبقيت مصدوم وفرحان جدّاً وقلت في نفسي للدرجة دي إحنا بقينا أصحاب... اليوم ده سألت أحمد زكي عايز أعرف أنت بتمثل إزاي؟ واليوم ده نمت وحلمت إني بصوّر معاه في لوكيشن، وللأسف ما قعدتش تاني معاه بس كنت فرحان بشخصيته اللي تتسم بالطيبة وروح الفكاهة والبساطة".

وعن أول عمل قدّمه مع والده، قال كريم محمود عبد العزيز: "أول مرة مثلت مع أبويا محمود عبد العزيز كان في فيلم "البحر بيضحك ليه؟"، وكان عمري وقتها 7 سنين، وكانوا بيعلموا بروفات في البيت، وكل شوية كان حد يطلّع شاي فأنا كنت عايز أطلّع الشاي علشان أقعد أسمع بيقولوا إيه".

وتابع: "كنت بطلّع الشاي وأعطي لكل واحد كوبايته، فسمعت إن فيه طفل في الفيلم فقالولي أنت اللي هتعمله بس لو معرفتش تعمله هيبقى فيه ولد تاني برة، أي حاجة هتلخبط فيها هندخّله، فوافقت وروحت معاهم الإسكندرية، وكان المشهد الختامي في آخر الفيلم قاعدين على البحر وبيجي ولد اللي هو أنا وبينده على الفنان نجاح الموجي، وأنا كنت مبسوط جداً وداخل أمثّل ومتزن وفجأة لقيت أبويا بيعدّي ورايح يقعد في حتة بعيدة فأنا اختلّيت واتوترت وقلت في سرّي إنت بعتني وتركتني ولقيت ركبي بترتعش وكإني فقدت الأمان، بس في النهاية عملت المشهد".

وأردف بالقول: "لما مثّلت مع والدي محمود عبد العزيز مسلسل "محمود المصري"، كنت بحفظ المشهد من وأنا في البيت، علشان محدّش يقول أنا متجامل وبتدلّع علشان أبويا، وجاء مشهد إن محمود المصري خسر فلوسه كلها فبيودّع ابنه وأنا المفروض بدخل وأعطيه الفلوس إللي هو كان بيدّيهالي كمرتّب كحتة جدعنة، ودخلت وبقوله الفلوس دي كنت بتدّيهالي وأنا دلوقتي مش محتاجها. المهم دخلت وحصل غلط من الكاميرا وهنعيد تاني فتكرر الغلط، وهما بيعيدوا قلت لنفسي الولد ده يتيم وحسّه مرهف ومحمود المصري وقف جنبه ليه متخشّش وعينك لامعة؟ وفعلاً عملت كده، بعدها لقيت بابا بيقوللي بتمثّل بقى إنت؟ فأنا مردّتش، وكررها، وداخل مرغرغ وبتاع وكلت محمود عبد العزيز بقى، فقلت له لأ بحاول أعمل مشهد حلو معاك مش أكتر".