نجلاء بدر ترد على انتقادات خضوعها للتجميل وتكشف السبب

خرجت الفنانة نجلاء بدر للمرة الأولى عن صمتها لتردّ على الانتقادات التي طاولتها خلال الفترة الماضية بعد إعلانها عن خضوعها لعملية تجميل في الوجه، حيث كشفت الأسباب التي دفعتها لذلك، موضحةً أنها أُصيبت بتليف في جزء من الوجه بسبب الفيلر، وأن الجراحة التجميلية هي الحل الأمثل للمشكلات الناجمة عن حقن الفيلر، مؤكدةً أنها لم تندم أبداً على عملية التجميل، بل كان ذلك أفضل القرارات في حياتها.

وقالت نجلاء في إحدى الندوات الصحافية: "فيه دور استدعى إني أحقن فيلر كنت رفعت حواجبي زي الشيطان وأعتقد عملت خدودي، لأن الشخصية كانت فنانة ونجمها واقع وعايزة تعمل في نفسها أي حاجة علشان تلفت النظر، ووقتها كان موضة حكاية الفيلر ولسة طالعة ومكنش حد بيجرؤ إنه يقول، ولكن أنا عملتها ولما بشوف المشاهد دي بضحك، ودلوقتي معملهاش وبدأت أقرأ عن خطورة الفيلر وعلى فكرة مبتدوبش".

نجلاء بدر: عانيت سنوات للتعافي من آثار الفيلر

وأضافت: "أنا خدت سنين علشان يدوب الفيلر ومبتدوبش، حتى إذابتها بتعمل مشاكل علشان المادة ممكن تعمل حساسية وبتدوب حتت آه وحتت لأ، وبتلاقي حتت عالية وحتت واطية وبتاخد وقت طويل عشان تتخلصي منها، والفيلر عمللي تليف في حتة ومراحتش، واللي خلاني أعمل عملية تجميل إني مش عايزة أحقن فيلر وبوتوكس".

وواصلت: "مشكلة الفيلر إنه بيتضخم، هي مادة جيلاتينية بتتنفش ومبتروحش ولا بتدوب، هي بعد فترة بتقل كثاقتها وبترجعي تحقني عليها وبالتالي حجم الرأس بيكبر عن الكتاف وده حصل مع بعض الفنانات".

وأكدت نجلاء بدر أنها ليست نادمة على إجراء عملية التجميل، بالقول: "أنا لقيت إن العلاج للحاجات اللي كنت متضايقة منها الجراحة هي الحل الأمثل، والفرق في الجراحة أننا مبنغيرش الشكل ولكن بنشيل الترهلات، رفعنا الجلد والعضلة وده مبيغيرش الشكل ولكن بيرجّعني أصغر، وبقول إن التجميل أسرع وأحسن قرار خدته في حياتي ومش ندمانة عليه خالص".

وعن سبب إعلانها الخضوع لعملية تجميل، قالت نجلاء بدر: "أعلنت علشان مندخلش في جدل والناس تجيب الصور من عند الدكتور ويقولوا دي عملت تجميل، أنا وفّرت لنفسي الجدل والمهاترات وقلت أنا عملت عملية".