غادة عادل تتحدث عن عمليات التجميل ونصيحة ميرفت أمين

كشفت الفنانة غادة عادل، خلال الندوة التي أقيمت لتكريمها على هامش مهرجان الغرقة لسينما الشباب، تفاصيل تجربتها مع عمليات التجميل، مؤكدة أنها أصبحت لا تهتم بالانتقادات.

وقالت غادة: "عملت تجميل وظبطت الحاجات اللي مضايقاني وبقيت مبسوطة، ودايمًا بشوف إن الواحد يعمل الحاجة اللي تسعده، ومحدش يستخسر في نفسه حاجة تخليه مبسوط".

أما عن خوفها من الانتقادات، عقب إعلانها خضوعها لعملية تجميل، فعلقت قائلة: "انتقادات ليه لو حاجة أنا حباها ومقتنعة بيها خلاص، وإحنا كبرنا على إننا نتضايق من الانتقادات، زمان كنت بقعد أعيط وأقول مش عايزة أشتغل، بس دلوقتي مبقتش أهتم أدور على الانتقادات.

وكشفت غادة خلال الندوة عن واحدة من النصائح المهمة التي أثّرت فيها خلال مشوارها الفني، وكانت من النجمة الكبيرة ميرفت أمين، حيث قالت: "ميرفت أمين قالت لي زمان إن الممثل ممكن يعيش حياته كلها، وييجي يعمل فيلم أو اتنين بس هما اللي يفضلوا علامة في تاريخه، ودي كلمة ما نسيتهاش من ساعتها كل أعمالي محطات مهمة في مشواري الفني".

غادة عادل: الصدفة لعبت دوراً كبيراً في حياتي

وعن تفاصيل تعاونها مع المخرج محمد خان في فيلم "شقة مصر الجديدة"، قالت غادة عادل: "حياتي كلها كانت عبارة عن صدف، وكل حاجة حصلت كانت بتوفيق من ربنا، دورنا الحقيقي هو إزاي نجتهد ونستغل الفرص اللي بتجيلنا ونسعى دايمًا للأفضل، مع الرضا بقضاء ربنا، لازم كل واحد يبص لطريقه علشان يعرف يعيش، ويكمل ويربي أولاده، ومفيش شاب المفروض ييأس، لأن ربنا موجود، وشايف الصبر اللي بنمر بيه".

وتابعت: "لما بكون مكتئبة بلجأ للفن، سواء مسرحيات أو أفلام، وإحنا صغيرين كنا بنشوف إن الهدف هو الظهور والشهرة، لكن لما كبرت فهمت إن الفن رسالة، وأولادي لما بيتفرجوا على أفلام بتناقش قضايا زي المخدرات، بيتعلموا منها وبيستفيدوا".

تابعت: "فيلم (شقة مصر الجديدة) كان نقطة تحول في حياتي لما بيكون الفيلم مكتوب كويس، بيقدر يطلع من الفنان كل إمكانياته، الفيلم ده جالي بصدفة غريبة، والمخرج الكبير محمد خان، الله يرحمه، قالي وقتها إني كنت آخر اختيار ليه لكن بعد عرض الفيلم، قالي إني كنت أحسن اختياراته".

مقالات ذات صلة

سمية الخشاب توجّه رسالة الى السيدات بسبب زيادة وزنها (فيديو)

حمادة هلال يحتفل بجائزة أفضل ممثل دراما بطريقته الخاصة (فيديو)

غادة عادل عمليات التجميل مهرجان الغرقة لسينما الشباب انتقادات ميرفت أمين محمد خان فيلم شقة مصر الجديدة الفن نجوم الفن مشاهير الفن