عمرو مصطفى يتحدث عن تصالحه مع عمرو دياب ويبكي (فيديو)

27 كانون الأول 2025 | القاهرة – "لها"

عمرو مصطفى

حلّ المطرب والملحن عمرو مصطفى، ضيفاً على برنامج "ضيفي" الذي يقدمه الإعلامي معتز الدمرداش على قناة الشرق الإخبارية، حيث أعلن في الجزء الثاني من الحلقة، مفاجأة يكشف عنها للمرة الأولى في حياته، مؤكدّا عدم دراسته للموسيقى، وأن سبب تميزه التلحيني هو موهبته ومشاعره.

وتحدث عمرو مصطفى عن فترة خصامه مع الهضبة عمرو دياب، لينفجر باكيًا خلال الحديث عن تصالحه معه، إضافة الى حديثه عن زوجته.

قال عمرو مصطفى: "أنا مش دارس موسيقى، ومعرفش السلم الموسيقي ولا النوتات ولا المقامات الموسيقية ولا الهوا، اللي بيشغلني مشاعري، واللي يعرف تشغله مشاعره يوريني، وأنا مبسوط ومش عايز أتعلم، واللي يعرف يعمل زيي يعمل".

وأوضح أنه كان السبب الرئيسي في عمل عدد من أشهر الموزعين مع الهضبة عمرو دياب، قائلًا: "أنا وعمرو دياب من أول ما دخلنا المزيكا ناقر ونقير، ولما بقوله يمين من قلبي والله ويعمل هو حاجة تانية، هو دماغه كده، ومعظم الموزعين اللي تعاونوا مع عمرو دياب كنت أنا سبب في وجودهم معاه".

عمرو مصطفى مع عمرو دياب

عمرو مصطفى: زوجتي رزق من الله

كما تطرق عمرو مصطفى للحديث عن زوجته، قائلًا: "مراتي لازم يتعملها تمثال، وأنا هعملها تمثال في البيت الجديد، لأن هي دي بعد أمي الله يرحمها هي اللي شكلت عمرو مصطفى واللي كانت بتوقفني، دي كل حياتي معاها، وولادنا بيدرسوا في لندن وهي أم مثالية ودي من الرزق اللي ربنا إداهوني، وأنا أول ما شفتها قلتلها هتجوزك وبعد أسبوعين كان الفرح، كانت جدعة أوي ولما رحت أطلب إيديها قعدت مع خالها لأن والدها متوفى، ودفعت المهر لخالها وأنا ماشي رجعتهولي وعرفت من وقتها إن دي مراتي".

وعن تصالحه مع عمرو دياب، بعد الخلافات التي نشبت بينهما خلال السنوات الماضية، قال عمرو مصطفى إنه بعدما تعرض لأزمة صحية كبيرة خلال الفترة الماضية أدرك وقتها أنه لا قيمة للخلافات وتصالح مع الهضبة، معربًا عن حبه الكبير له وتقديره لعلاقة الصداقة والأخوة التي تجمعهما.

وبكى عمرو مصطفى، خلال حديثه، وقال: "من كتر حبي في عمرو دياب، حصل اللي حصل، أنا اكتشفت ده بعد ما تعبت واكتشفت أني بحبه أوي، هو أخويا ولما كتبلي بوست خلاص كل الزعل راح ولا كأن حاجة حصلت، وهو لما بيغني كأن أنا بغني لأني عايز أغني، فكنت الأول بزعل ولكن دلوقتي ولا أي زعل".

وأضاف: "عمرو كلمني قبل ما يكتبلي بوست وهزرنا، وأنا اديته كل حياتي وأغانيا كلها وأحلى حاجة بتطلع على طول كان عمرو بياخدها، وساعات سميرة سعيد ومحمد حماقي".

عمرو مصطفى: لا يجب علينا كفنانين نشر الحقد بيننا

وأكد عمرو مصطفى، أنه أصبح ينظر للحياة بمنظور آخر بعد وعكته الصحية الأخيرة، قائلًا: "بعد أزمتي الصحية شفت الحياة بفلسفة مختلفة، قلت أنا ليه أتخانق وليه أزعل من حد وليه أتنرفز؟، بصيت إن عمرو مصطفى أكيد ربنا إداله الموهبة علشان هدف في الحياة، المفروض إننا كفنانين ننشر الخير والحب والسلام، الفترة اللي كنت فيها عندي الخناق والزعيق وكنت تصادمي وبزعق والحقوق، اكتشفت أن ربنا قالي أنا إديتك الموهبة علشان الخير والسلام مش الزعيق والخناق والحقد، ولما اتصالحت مع الناس لاقيت الناس بعتتلي بتقولي إنهم اتصالحوا مع اللي كانوا زعلانين منهم، فعرفت أن تفكيري كان صح".