خالد الصاوي يتحدث عن أسباب غضبه من نفسه ويكشف تفاصيل جديدة عن حياته (فيديو)

حلّ الفنان خالد الصاوي ضيفاً على برنامج "كلمة أخيرة" الذي يقدّمه الإعلامي أحمد سالم على قناة ONE، حيث تحدث عن أزماته ونجاحاته في العام 2025، مشيراً الى أنه غاضب من نفسه بسبب أسلوب حياته الذي جعله يخسر كثيراً لناحية صحته وعلاقاته.

وقال الصاوي: "2025، كانت سنة فارقة في حياتي، نصها الأول كنت زعلان من نفسي ونصها التاني الحمد لله راضي عن نفسي".

وأضاف: "النص اللي زعلان فيه من نفسي لأني كنت ماشي على سيستم مش كويس خسّرني كتير بالشكل والصحة والعلاقات، على الرغم من إني دي الوقتي الحمد لله ماشي على نظام علشان أخسّ وبتمرن وبنام بدري".

وتابع: "النص التاني اللي راضي فيه عن نفسي، عملت ثورة وكاتبها في اليوميات الثورة الخلودية الكبرى، وبركّز وبخطّط فيه لمشواري".

وأشار خالد الصاوي الى أنه شخص صعب المراس وحادّ الطباع قائلاً: "أنا حد صعب جداً وأحياناً الصعوبة بتكون إيجابية علشان ما تخدنيش بالساهل، وممكن تديك شوية عمق وماتاخدش الأمور على علّتها وتدرس المواضيع وتدرس الناس كويس، وماتظلمش بقدر الإمكان، أحياناً ليها عيوب زي إنك معقّد أو مكلكع وصعب الإرضاء".

خالد الصاوي: أنا شخصية معقدة

وأكد خالد الصاوي أنه شخص معقّد، قائلًا: "لأني مش سهل ومن وأنا صغير جداً بدأ الموضوع معايا بحساسية تجاه بعض الأمور زيادة، أول مرة أنتبه إن فيه ظلم كنت صغير، لأني كنت في الجيل اللي كان فيه احتلال واستعمرنا واحتلينا ووعيت على ده وإسرائيل والدول الكبرى بتعمل معانا كده ليه، ثم كان في حاجات في المدرسة بتضايقني سواء طريقة المعاملة السيئة لأننا كنا في الستينيات وكنا بننضرب، ووالدي كان محامي وقصة العدالة في البيت موضوع مهم أوي".

وتحدث الصاوى عن والديه وكيف أثّرا في نشأته، بجانب حديثه عن بدايته ودراسته للمحاماة وعمله في هذا المجال لفترة قصيرة. إذ قال: "لولا أمي وأبويا وبعدهم أختي كان ممكن أكون مجرم، أنا كنت أستبكر إني أخاف، أحياناً متهور وأحياناً مندفع وأحياناً عنيد وصدامي، لكن همّا كانوا بيحطوا لي قيم ورحمة ويجذبوني ناحية حاجات أحياناً بالشدة وأحياناً باللين".

وأضاف: "أبويا لما يحصل حاجة وأكذب، يصدّقنى ويقول لي خالد ما بيكذبش وراجل فتصعب عليا نفسي وأبطّل المرة اللي بعدها، وكان يقول لي لو قلت لي الحقيقة محدّش هيلمسك حتى لو عامل مصيبة، لكن لو كذبت نهارك هيبقى إسود، فجرّبته وكنت بقولّه الحقيقة حتى لو كانت فادحة وكان صادق معايا، كان يسألني أنت راجل ولا لأ؟ أقولّه آه طبعاً، يقولّي يبقى كلمتك تكون واحدة، وأمي نضّفت كتير في شخصيتي بالرحمة، وأختي رغم أنها كانت أصغر مني لكن أحياناً بتكون حكيمة كأنها هي الأكبر، استوعبوني بالدفا والحنان وخلّوني أفكّر فيهم قبل أي مصيبة".

وكشف خالد الصاوي أن والديه كانا فخورين بما وصل إليه رغم خوفهما الشديد عليه في البداية، حيث قال: "كانوا خايفين في الأول، لأني كنت في الجامعة بعمل كل الأنشطة الفنية والأدبية والسياسية، وكنت داخل في 100 حاجة فكان الإحساس عندهم إني ممكن أكون مرووش أو مشتت أو طمّاع وعاوز أعمل 100 حاجة، ولما اتخرّجت لأول وهلة اتقال إنه هيبقى شاعر وهاوي، لكن هيشتغل مع أبوه في المحاماة ويركّز، ومفيش مانع يكون بيكتب، لكني فاجأت والدي وقلت له مش هشتغل محامي تاني وهو باله طويل، وقلت له هكون فنان وهكتب وهخرج وهمثّل وهعمل مزيكا طبعاً بالنسبة له صدمة، وأمي شافت إني بضيع".

خالد الصاوي: والداي تعبا كثيراً معي

وأردف الصاوي بالقول: "أبويا وأمي تعبوا معايا جداً، أمي وأنا في ابتدائي كانت بتدعي إني ما أدخلش الإصلاحية، وأنا في ثانوي كانت بتدعي إني ما أدخلش السجن، وأنا في الجامعة كانت بتدعي ما ادخلش المعتقل، وكانت فاكرة إني لما أتخرّج هترتاح، ومع ذلك الحمد لله أبويا دعمني بعقله وأمي بعاطفتها".

وأضاف: "الظروف كانت صعبة جداً، وعملت فيها راجل، وكنت لما أتزنق أروح لأبويا أقوله أشتغل معاك لأني مكانش معايا فلوس، يقولّي هو أنا فاتحها سبيل".

وعن ذكرياته في المحاماة، قال خالد الصاوي: "أول مرة أترافع جنحة خدوا حكم هما الاتنين فروحت متعكنن أوي، وأبويا قال لي أنت عملت مسرحيات ما وقعتش في أولها؟ ولعبت رياضة ما اضربتش؟ قال لي هي المحاماة كدة، أنا اضايقت يمكن علشان هي جنحة فحسّيت إن المحامي بينقذ الأرواح".

مقالات ذات صلة

عادل إمام يتلقى رسائل التعزية في وفاة شقيقته من نجوم الفن

دارين حداد تستعرض بفيديو تحضيراتها الأخيرة ليوم زفافها

خالد الصاوي شخصية معقدة محاماة ذكريات