مي فاروق تتحدث عن مأساتها في زيجتها الأولى وأكبر فقد في حياتها (فيديو)

حلّت الفنانة مي فاروق، ضيفة على برنامج "عندي سؤال" المذاع عبر قناة "الجديد" حيث تحدثت للمرة الأولى عن تجربة زواجها الأول، موضحة أنها كانت تجربة مريرة استمرت 12 عامًا، وأنها فقدت الثقة بمن حولها وبموهبتها بعدها.

وقالت مي: "الزواج ده نتج عنه أحلى حاجة في عمري أولادي زينة ومالك، واستمر 12 سنة، وبالنسبة لمي لوحدها بعيدًا عن الأمومة، الأسود كان كتير في الـ12 سنة دول، أنا مكنتش عندي تجربة وطول الوقت مقفول عليا، ودي كانت أول تجربة حقيقية أمر بيها".

وتابعت: "التجربة دي تركت فيَّ ضرر داخلي رهيب، مريت بتجارب نفسية عمري ما كنت أتخيل إني همر بيها، وكنت بعديها لأني أم، وصعوبة الموضوع انعكس على نفسيتي وبدأت تخليني أفقد الثقة في الناس وفقدت الثقة تمامًا في نفسي وكنت شخصية مهزوزة جدًا".

وأضافت مي فاروق: "شكيت في نفسي وشكلي وموهبتي وإني أصلًا أصلح أغني، أنا بغني ليه؟، أنا مش عايزة حاجة، كنت فاقدة الثقة في كل حاجة في حياتي، كان عندي إحساس بنسبة 99% على مدار 24 ساعة في اليوم إني حالًا هموت وأسيب ولادي، كان عندي رعب، والتربية القديمة بتاعتنا إن البنت مينفعش تتطلق وتكمل علشان الأولاد ده أكبر مبدأ غلط في الدنيا، أنا اتربيت إن البنت بتطلع من بيت أبوها على بيت جوزها على التربة، أنا انفصلت أول مرة برضا والدي لما بنتي كان عندها 5 سنين، ورجعت بسبب إحساس بالذنب، وربنا رزقني بمالك، وانفصلت تمامًا في 2018، وكان سهل جدًا أطلب الطلاق لأن المكان مش مكاني".

واستكملت: "إيه اللي هضحي علشانه وأكتر من 12 سنة من عمري وفي الآخر أفقد نفسي وولادي عايزيني، عديت بمواقف عمري ما كنت أتخيل إني هعدي بيها، أنا طالعة ببنوتة عندها 11 سنة وبتبدأ سن مراهقة، وطالعة بيهم عندهم شوية مشاكل من الانفصال، اللي عيشته كان قاتل، أنا بموت نفسي وولادي كانوا هيعيشوا يتامى الأم".

مي فاروق: وفاة والدتي كانت أكبر فقد مررت به في حياتي

وكشفت مي، تفاصيل الفترة الأخيرة في حياة والدتها، موضحة أن والدتها شعرت بقرب رحيلها قبل وفاتها بـ40 يومًا، مؤكدة أنها نفذت وصيتها طبقًا لرغبتها.

وقالت: "أمي توفيت وأنا عندي 21 سنة، وكانت أول وأكبر فقد في حياتي، صدمة غير متوقعة من كتر ما كنت شايفاها قوية، ومعرفتش أفهم ليه توفيت طبعًا استغفر الله دي أقدار وأعمار ولكني ساعتها كنت شايفة إن دي الوحيدة اللي هتفضل جنبي وكانت أول واحدة مشيت، وساعتها كنت متحملة مسؤولية حاجات كتير وشفتها وهي بتتعب، وفي الفترة الأخيرة كل حاجة جت بسرعة وقبل وفاتها بـ40 يوم كنت حاسة إنها هتتوفى".

وتابعت: "قبل وفاة أمي طلع كلام إن هتدخلوا النار علشان بنتكم بتغني، وهي كانت دايمًا بتخاف وبتقولي أنا ممكن أدخل النار علشان أنتي بتغني؟، قلتلها ربنا مبيعملش في حد كده وحساباته مختلفة، وهو اللي إداني الموهبة ولو مش عايزني مش هيوفقني، قبل الوفاة بأسبوع قالتلي أنا عارفة إنك بـ100 راجل، وعارفة أنتي مين كويس أوي، وأنا مبسوطة بيكي، دي كانت أول مرة ماما تقولي كلام فيه حنية، وقالت لي إنها بتخاف عليَّ من كتر حبها فيَّ لأنها معندهاش غيري، ولما سمعت الكلام ده كنت زعلانة لأني كنت عارفة إنها هتمشي ومش هتكمل".

وأكدت مي أنها نفذت وصية والدتها، موضحة: "أيام ودخلت في غيبوبة وكنت أنا اللي مسؤولة عن كل حاجة في التوقيت ده، لأنها كانت موصياني من صغري لو حصلها حاجة أنا اللي أبقى المسؤولة عنها في كل حاجة وأنا اللي أتحكم وأنا اللي أبقى موجودة في الغُسل مش حد غيري، ونفذت لها كل اللي هي كانت عايزاه بما يرضي الله ومشيت وهي مرتاحة ومبسوطة وراضية عني".

واختتمت مي فاروق كلامها عن والدتها قائلة: "مش عارفة بعد وفاة أمي عديت إزاي، السنين اللي بعد أمي أنا مش فاكرة تخطيت وفاتها إزاي، أنا كنت بسمع صوتها طول الوقت في البيت بتنادي عليَّ".

ونشرت الفنانة مي فاروق مؤخراً، عبر حسابها الخاص على "فيسبوك" مجموعة صور جمعتها بزوجها الفنان محمد العمروسي احتفلت من خلالها بذكرى زواجهما الأولى، موجهة له رسالة رومانسية مؤثرة.

شارك