مي فاروق: فقدت الأمل في الشهرة وأم كلثوم أنقذتني

15 شباط 2026 | القاهرة - "لها"

مي فاروق

حلّت الفنانة مي فاروق، ضيفة على برنامج "عندي سؤال" الذي يقدمه الإعلامي محمد قيس عبر قناة "المشهد"، حيث تحدثت، عن فترة انطلاقتها الفنية، موضحة أن مشاركتها في حفل روائع الموجي بموسم الرياض وتقديمها أغنية اسأل روحك لكوكب الشرق أم كلثوم، أنقذها وكان نقطة فاصلة في حياتها الفنية، وذلك بعد فقدانها الأمل في الشهرة بعد العديد من المحاولات للظهور في عالم الغناء.

وقالت مي: "أنا قوية جدًا وده من ربنا مش شطارة مني خالص، وخلال 12 سنة في زواجي الأول كنت بعمل حفلات ولكن بحاول أعافر طول الوقت لأني عايزة أتعرف، وكنت بقول كتير بيني وبين ربنا يا رب لو أنت شايف أن لو هذه الموهبة اختبار ليا فأنا أضعف من أني اختبر، لأني مش عارفة أنجح ومش عارفة أتشهر وأنا عندي موهبة زي دي، وكل حاجة حواليا بتمشي تمام وناس معندهاش ربع الموهبة دي وبتنجح وأنا قاعدة مكاني مش عارفة أعمل إيه، وطلبت من ربنا لو أنت شايف كده اسحب الموهبة دي أنا مش عايزة أغني أنا تعبت، كانت فترة صعبة ومحبطة في كل حاجة".

مي فاروق: من اتهموني بعدم النجاح أول من قالوا إني أهم مطربة

وأضافت مي فاروق: "ناس قفلت الباب في وشي كتير، واتقالي أنتي بتغني قديم وده مش هينفع وعمرك ما هتنجحي، طب ما أنا بغني قديم علشان معنديش أغاني بتاعتي، عايزة حد يقولي تعالي هنعملك أغاني، وفي ناس قالت لي عمرك ما هتنجحي ولفت الأيام وقالوا كنا بنقول هتبقى أهم واحدة".

وعن انطلاقتها الفنية، أوضحت مي فاروق: "غنيت اسأل روحك في حفل روائع الموجي، والحقيقة أني معملتش حاجة وكنت مريضة في الحفلة دي، أول ما نزلت من على المسرح لقيت السوشيال ميديا كلها بتتكلم عليا، ربنا أراد أنه يشاور عليا في حفل روائع الموجي، طول عمري بغني وبغني لأم كلثوم، ولكن ربنا قرر لي دلوقتي أن تبقى دي النقطة اللي هتوريلي كل الحاجات الحلوة".