عمرو محمود ياسين يرد على اتهام ياسمين عبد العزيز بالتدخل في إدارة المسلسل

انتشرت خلال الأيام الماضية اخبار على مواقع التواصل الاجتماعي حو تدخل الفنانة ياسمين عبد العزيز في تفاصيل مسلسل "وننسى اللي كان" وأنها هي التي تتحكم في كل شيء بالعمل لدرجة تغيير أسماء الشخصيات لإرسال رسائل معينة لبعض الأشخاص.

ودافع الكاتب والسيناريست عمرو محمود ياسين عن ياسمين ضد الشائعات والاتهامات الموجهة لها في كواليس تصوير المسلسل، حيث كتب عبر حسابه الخاص بموقع "فيسبوك": "حقيقي أنا مش مصدق اللي بيحصل مع الفنانة ياسمين عبد العزيز، لو تتر اتغير من حاجة لحاجة يبقى ياسمين، لو ممثلة أو ممثل بيقول جملة معينة هنا أو هنا يبقى ياسمين، طيب أنا رحت فين، لو حد لابس لبس معين يبقى ياسمين!! لو شخصية متسمية اسم بعينه يبقى ياسمين.. واقسم بالله إن هذا غير حقيقي! لأن المسلسل له مؤلف ومخرج ومنتج وستايلست وأقسام تخصصية".

عمرو محمود ياسين: ياسمين عبد العزيز شخصية قوية

وأضاف عمرو: "إحنا مش هواه، إحنا بنشتغل وكل واحد فينا بيحترم دور الآخر وكل واحد مسؤول عن اختصاصاته ودوره في العمل، أكيد بنتشاور وبنفكر مع بعض كلنا للوصول لأفضل قرارات اللي فيها مصلحة المشروع.. بس الموضوع كله تصفية حسابات للأسف الشديد، وهي بقت مش عارفة تعمل إيه لما تطلع ترد الناس تقول لها بتردي ليه؟ ولما تسكت الناس بتصدق الاتهامات!!".

وتابع عمرو محمود ياسين: "حقيقي أنا بشفق عليها ولكن اللي بيخليني أهدى إن ياسمين قوية جداً.. جدًا جدًا وبتقابل ده كله بسخرية وضحك وبترد تقولي أنا مش شايفاهم بس أنا متعود أواجه والناس اللي بتتابعني عارفين عني ده ولازم الجمهور يعرف الحقائق لأن أنا بعتبر الهجوم على ياسمين هو جزء من الهجوم على مشروعي اللي كلنا بنبذل فيه مجهود كبير جدا جدا.. وربنا يصلح حال الجميع.. وخالص التقدير والاحترام للجميع".