ملابس كريم فهمي في "وننسى اللي كان" تشعل مواقع التواصل الاجتماعي

اشتعلت مواقع التواصل الاجتماعي خلال الأيام الماضية بالحديث عن ملابس الفنان كريم فهمي في مسلسل "وننسى اللي كان"، خاصة بعد ظهوره بستايل ملابس مختلف عما اعتاد الظهور به في أعماله الفنية السابقة. 

وحول تنسيق الملابس الخاصة بشخصية "بدر السباعي" التي قدّمها كريم في المسلسل، كشف منسق الأزياء سعيد رمزي عن تفاصيل الملابس التي أطل بها كريم فهمي خلال المسلسل وكيف أثّرت في الأحداث.

وقال سعيد رمزي في تصريحات صحافية: "شخصية كريم فهمي، بنشوفها في الشارع المصري وعايشة في وسطينا والنموذج اللي حبيت أقدمه مش زي كل الحارات اللي مافيهوش ذوق وأسلوب اللبس اللي مش حلو، حبيت أقدم الحارة شيك ومحترمة، وفي بيوت شعبية نضيفة ومهذبة والناس بتعرف تلبس والشارع المصري شكله اتغيّر وفي اللبس سواء الصيني أو التركي، ومش لازم نوصل للناس إنه عشان شعبي أنه يبقى لبسه قميء، بالعكس بيعرفوا يلبسوا بأقل الإمكانيات، وفي فرق بين كلمة شعبي وبيئة، شعبي يعني فلوسه متواضعة ولكن لبسه وهيئته شكلها حلو، بيئة هي انعدام الذوق والنضافة واللغة وهنا بنروح لمستوى متدني أكتر، وليس كل ما هو شعبي قميء".

سعيد رمزي: ملابس كريم فهمي من وكالة البلح

وأضاف سعيد رمزي: "الجاكيت الجينز والبنطلون جبتهم من وكالة البلح لكريم فهمي عشان يبان إنه مستهلك، وكل اللي ضيفناه تي شيرت من تحت، واختيار ملابس الجينز لشخصية (بدر) كان لأن الخامة دي عايشة وممكن يبقى عايش جوا الحارة ولو اتطلب منه يروح مول هيبقى بنفس المظهر".