يوسف الشريف يكشف سبب غيابه عن الدراما وتحديات تجربة الانفصال (فيديو)

حلَّ الفنان يوسف الشريف ضيفاً على برنامج "صاحبة السعادة"، الذي تقدّمه الفنانة إسعاد يونس على قناة dmc، حيث تحدث عن العديد من أموره الشخصية والفنية، كاشفاً عن التحديات التي واجهها مع ابنيه في بداية انفصاله عن الكاتبة إنجي علاء، وعن سبب غيابه عن الدراما، موضحاً أنه لم يكن يجد العمل المناسب الذي يحترم عقل المشاهد كما اعتاد جمهوره منه.

قال يوسف الشريف: "الفترة اللي فاتت دي جائز كنت أحاول أعمل أعمال تانية ومكنش عندي الفرصة إني أقدم اللي أنا عايز أعمله بالشكل المضبوط في وجهة نظري اللي أحس أني بحترم فيه الناس، وده العقد اللي أنا ماضيه مع الناس بشكل ضمني".

وتابع: "دايماً اللي بفكر فيه ليه أشتغل وإيه اللي هينفعني لو عملت العمل ده، والفترة اللي فاتت حاولت أن يبقى في الفرصة اللي فيها العمل المظبوط ويتنفذ بالطريقة المظبوطة اللي أحضره وأشتغله بشكل صح".

أما عن التحديات التي واجهته هو وابنيه في بداية فترة انفصاله عن المؤلفة إنجي علاء، فقال يوسف الشريف: "أنا عايش مع أولادي عبد الله وعبد الرحمن، هما توأم متماثل وعندهم 16 سنة، في بداية التجربة كانت صعبة وكنت بقول هكمّل إزاي؟ أنا بليد جداً في كل حاجة، لغاية إننا في أول أيام في التجربة دي كنا بندوّر على الغسالة في البيت، قعدنا وعملنا خطة وكل التفاصيل كانت ملخبطة، ودلوقتي بعتمد عليهم وبيساعدوني في كل حاجة ودلوقتي بيساعدوني في شغلي".

يوسف الشريف: تركت الكرة عندما تركني الأهلي

وتحدث الشريف عن فيلمه الشهير "العالمي"، موضحاً أن نادي "فالنسيا" الإسباني، دعاه لتقديم جزء ثانٍ من العمل، بجانب حديثه عن لعبه في ناشئي النادي الأهلي وتفاصيل تركه للنادي.

وقال: "فيلم العالمي مهم جداً لنادي فالنسيا، وهما حاسين إن الناس بتحب جداً الفيلم ده وأصبح يوجد جمهور أكتر من الشرق الأوسط للنادي والدوري الإسباني، وحتى وقت قريب كانوا بيتكلموا إن ليه مايكونش فيه جزء تاني، وفي بداية الدوري الإسباني فالنسيا قالوا لي تعالى أحضر مباراة ونفتكر الذكريات والأماكن اللي صوّرت فيها".

وأضاف يوسف الشريف: "ممكن جداً لو حسّيت إني هقدر أقدم حاجة جديدة ليه لأ؟ أنا بحب الفيلم ده جداً وبحب شخصية "مالك" والأجواء كلها كانت هايلة".

أما عن تفاصيل لعبه في النادي الأهلي، فقال يوسف الشريف: "كنت في ناشئين النادي الأهلي حتى 19 عاماً، أنا سيبت الكرة لما النادي الأهلي سابني، الفترة دي اشتروا لاعبين كتير ولم أقيّد، والفرقة كلها اتسرّحت وساعتها حسيت إن العالم انتهى، وأنا راجع وقفت على الكوبري ورحت أعيّط".

وأضاف: "فيلم "العالمي" كان عن التعامل مع لاعب الكرة كبشر، وفكرة إني كنت هعمل لاعب كرة بجد ومشوار صعوده عامل إزاي أنا في لحظات بالفيلم نسيت خالص إني بمثّل، أنا عشت التجربة وعلاقتي مستمرة بنادي "فالنسيا" حتى الآن".

شارك