محمد رمضان يتحدث عن غيابه درامياً وأجره وبداياته في التمثيل والغناء (فيديو)

حلَّ الفنان محمد رمضان ضيفاً على برنامج "الحكاية"، الذي يقدّمه الإعلامي عمرو أديب، حيث كشف خلاله للمرة الأولى عن تفاصيل حياته الشخصية وبداياته الفنية وأسباب اتجاهه الى الغناء، معلناً للمرة الأولى عن عمره الحقيقي وأجره عن آخر أعماله الدرامية، وأسباب غيابه عن الدراما لمدة ثلاث سنوات.

في البداية، أشاد الإعلامي عمرو أديب في مقدّمة برنامجه بالفنان محمد رمضان، مؤكداً أنه أصبح واحداً من أبرز النجوم في الوطن العربي.

وقال عمرو أديب: "قليلين هما الفنانين اللي أخدوا مكانهم خلاص، وهناك فنانين يصلون الى مرحلة يصبح فيها وجودهم وحده حدثاً، لازم تبقى عارف إن إنت عندك كيان فني كبير، تحب وتكره، تبقى معاه أو ضد بعض تصرفاته، يعجبك عمل وما يعجبكش عمل، لكن في نهاية اليوم إنت قدّام شخصية غير عادية".

وتابع: "حتى لو حد قال إنه مش نمبر 1 أو نمبر 2، في النهاية إحنا قدّام راجل موجود في الحتة دي، أي حاجة يعملها بيبقى ليها رواج، وليها دوشة واهتمام، ويبقى ليها ناس مع وناس ضد، وهو ده الفنان الحقيقي، وهو ده النجم".

وأضاف: "هو بحق قدر ياخد مكانة لا نستطيع إن إحنا نتناقش فيها كتير، خلاص الراجل وصل للحتة دي وبيفكّر من المكانة دي، تقعد تستنى كل سنة هيعمل إيه؟ هينزّل أغنية؟ يعمل فيلم جديد؟ طب نروح نتفرج عمل إيه وجاب إيه وراح فين".

ومازحه عمرو أديب قائلاً: "ليا عندك 300 ألف جنيه، ليه ما تدفعهمش؟"، ليردّ رمضان: "أنا معايا 300 جنيه دلوقتي تاخدهم".

محمد رمضان: أتمنى أن أكون مثل "الزعيم" ومنعي من الظهور غير صحيح

وقال رمضان عن أسباب غيابه عن الدراما خلال السنوات الثلاث الماضية، بعد مسلسل "جعفر العمدة"، إن ما أشيع على مواقع التواصل الاجتماعي، عن منعه من الظهور على الشاشات خلال هذه الفترة غير صحيح.

وقال رمضان: "كنت بشوف إشاعات كتير عن إني ممنوع من الظهور على الشاشة، إيه اللي مانعني؟ أنا كنت بعيد عن الدراما بمزاجي عشان أعرف أركز في فيلم "أسد"، وأعمل حاجة تليق بالجمهور، وكان عندي تخوف كبير إن الدراما تاخدني من السينما".

واختتم حديثه بالإشارة إلى الفنان عادل إمام كنموذج فني مهم، في سياق حديثه عن مسيرته وتجاربه بين السينما والدراما، قائلاً: "ابتعدت عن الدراما علشان بصّيت على تاريخ الزعيم السينمائي وعايز أبقى زيه".

وكشف رمضان للمرة الأولى عن عمره الحقيقي، قائلاً: "وقت "جعفر العمدة" كنت بعمل شخصية راجل عنده 50 سنة، وأنا كنت 35، وقلت لنفسى ليه مستعجل تعمل الأدوار دي في السن دي؟ أمّال لما أبقى 50 سنة هعمل أدوار إيه؟".

وعن بداية مشوارة في الغناء بجانب التمثيل، ونجاحه فيه، والمواقف التي تعرض لها من رفض النجوم العمل معه، قال رمضان: "أنا مش مطرب لأن كلمة مطرب كبيرة أوي تخص فئة معينة، أنا مغني بحب الغناء وعملت لنفسي نوع معين من المزيكا حاولت كتير أخلّيها تعيش لأنها لون غريب مش متعارف عليه في المزيكا عندنا".

وتابع: "في بداياتي في الغناء كان في نجم عايز أعمل معاه شغل وموافقش يقابلني لأنه مكنش يعرفني لسه، ولما اشتغلت على نفسي واقدرت أثبت لون المزيكا اللي اشتغلت عليها، رجع وطلب يشتغل معايا وعملنا أغنية مع بعض في 2020".

وأضاف رمضان: "الغناء فلوسه أكتر من التمثيل بكتير، دايما بقول إن الممثل غلبان".

محمد رمضان: "نمبر 1" جاءت صدفة

وعن لقب "نمبر 1"، أكد محمد رمضان أن الفكرة بدأت من أغنية قدّمها في بداية دخوله عالم الغناء، قبل أن تتحول الى علامة مميزة ارتبطت باسمه لدى الجمهور.

وتابع: "نمبر وان كانت فكرة أغنية، وأول أغنية في مسيرتي الغنائية كأول ممثل في الأصل بقى بيغني، مش العكس، لأن في نجوم كتير مطربين بقوا بيمثلوا عادي، ورقصة نمبر وان جات بالصدفة وإحنا بنسجّل فبقت رقصة الأغنية وبقى لقبي، ومبسوط إن في أطفال صم وبكم لما بتتعمل قدامهم الرقصة بيعرفو إن دا محمد رمضان".

وعن صفات "نمبر1" في رأيه؛ قال رمضان: "هو الشخص اللي بياخد الأسبقية، والأكثر تأثيراً وقرباً من جمهوره، واللي بيجيب فلوس أكتر دا نمبر وان".

ورد محمد رمضان على حالات الجدل التي أثارها خلال الفترات الماضية بسبب ظهوره المتكرر بسياراته الفارهة واستعراض أسلوب حياته عبر مواقع التواصل الاجتماعي، وهو ما اعتبره البعض نوعاً من التباهي والاستفزاز، خاصة في ظل الظروف الاقتصادية التي يمر بها الكثير من المواطنين.

وقال رمضان: "بحب العربيات من صغري، ومكنش عندنا عربية في البيت قبل دخولي التمثيل، وكنت دايماً بحب أحتفظ بصور العربيات عشان ليا حلم يبقى عندي عربيات كتير، وكل اللي حلمت بيه حققته وجبت كل العربيات اللي نفسي فيها".

وعن تعمّده نشر فيديوهات عن أسطول سياراته، بطريقة قد تبدو مستفزة بالنسبة الى الجمهور؛ قال: "مكنش قصدي أستفز حد، لكن دايماً فيديوهاتي بكون بقصد بيها فئة معينة، بكون عايز أوصل رسالة للشباب أننا نقدر نعمل كل حاجة ونحقق أحلامنا".

محمد رمضان: أنا الأعلى أجراً منذ سنوات

وعن الجدل الذي أُثير حول تصريحاته السابقة بشأن تصدّره قائمة الأعلى أجراً، أكد رمضان أن حديثه لم يكن بهدف التفاخر أو إحباط الجمهور، وإنما استند الى نجاحات حققها على أرض الواقع.

وقال رمضان: "أنا الأعلى أجر من زمان، أنا على mbc من زمان، ولما قولت من زمان إني أعلى أجر كنت عامل "الأسطورة"، وكان محقق نجاح كبير، يعني مش عامل حاجة بحبط بيها الجمهور وبقول إني أعلى أجر".

وأضاف: "من 10 سنين كان أجري في مسلسل "الأسطورة" 45 مليون جنيه، وحالياً بأسس جمعية خيرية مش محلية بتخدم كل المصريين وغيرهم ومعايا كيانات ضخمة، ولذلك الجمعية هتاخد وقت ومجهود مني زي التمثيل والغناء".