مايان السيد تتحدث عن علاقتها بوالديها وسبب انفصالها عنهما (فيديو)

حلّت الفنانة الشابة مايان السيد ضيفةً على برنامج ABTalks الذي يقدّمه الإعلامي أنس بوخش على "يوتيوب"، حيث كشفت العديد من جوانب حياتها الشخصية والفنية، مشيرةً الى أنها بدأت مشوارها في عمر الـ17 من خلال الإعلانات، مؤكدةً تصالحها مع الشهرة بعد مرورها بفترة فوبيا ورفضٍ لها إثر تعرضها للعديد من الانتقادات حول أدائها في بعض الأعمال بالإضافة الى ملامحها.

وتحدثت مايان عن بداياتها قائلةً: "بشتغل من وأنا عندي 17 سنة، وقررت أنفصل مادياً عن أهلي وبصرف على نفسي، ولما قررت أوقف الإعلانات، قولت أنا عايزة أمثّل في مسلسلات وأفلام، ولما عملت أوديشن اتقبلت من أول مرة، وفي السنة ديه عملت مسلسلين، منهم واحد كنت هطلع بطلة في العمل واعترض عليّا بطل العمل فطلعت صاحبتها وكان بالنسبة لي مش مشكلة لأني عايزة أمثّل فأي حاجة تيجي".

مايان السيد: لم أكن أحب الشهرة ولا متصالحة معها

وأشارت مايان الى أنها لم تكن متصالحة في البداية مع الشهرة، بالقول: "دلوقتي بحب الشهرة وتصالحت معاها، جات عليا فترة جالي فوبيا ومكنتش بحبها بعد ما كان بيجيلي تعليقات وحشة وبيطلع عليا إشاعات، ولكن اشتغلت على نفسي لحد من سنة وبقيت بقول إن دي نعمة إن فيه ناس بتحبني وبيتابعوني، في البداية كان بيجيلي تعليقات من الناس زي انتي حوله لا تخنتي لا رفعتي، بعدين تصالحت مع شكلي زي ما أنا وأحبه".

وأضافت: "قعدت سنين في فكرة إني مش محبوبة وجاتلي فترة بقيت مش عايزة أخرج خالص وهفضل قاعدة في البيت وده أمان بالنسبة لي ومش هتعرض للناس لحد ما المعالج بتاعي قالي تحبي تكوني الجمهور اللي بيتفرج ولا على المسرح؟، فقولتله عايزة أكون على المسرح فقالّي لازم تعيشي وتخرجي وتعرفي إن هيبقى فيه وجع".

وتطرقت مايان السيد في حديثها أيضاً الى الإخفاقات التي مرت بها، قائلةً: "من سنتين عملت مسلسل ما نالش إعجاب الناس وكانوا بيشتموني وعرفت هنا يعني إيه الناس تشتمني وتقول تعليقات وحشة أوي وكنت بقرأ كل حاجة ووقتها كنت مش واثقة في نفسي وبستنى تصفيق الناس فتعبت أوى وفكرت في حاجات كتير فكرت ماكملش وللأسف جالي تفكير إن أأذي نفسي".

مايان السيد تتحدث عن رحلتها مع فقدان الوزن

أما عن رحلة مايان السيد مع فقدان الوزن، فأشارت الى أنها لم تكن تحب شكلها لفترة طويلة من حياتها، قائلةً: "وأنا صغيرة كان فيه واحدة قريبة مني قالتلي إنتي عندك كرش ومن وقتها فيه حاجة اتكسرت جوايا ومبقيتش آكل لمدة شهر لحد ما خسيت وده جابلي أنيميا وقعدت فترة طويلة بيغمى عليا بسبب اللحظة دي ومكنتش حابة شكلي، ولحد من فترة قريبة كنت باخد دواء لمدة سنتين بدون استشارة دكتور وكان بيخلي مودي وحش وبروح الشغل تعبانة ولما أوقفه بتخن أرجع أخده تاني وبقى إدمان، خلاني بشكل ما مش حابة نفسي وبأذي نفسي".

وأكملت: "لحد من سنة اتعرضت لوعكة وبابا وماما كانوا هينفصلوا، فسافرت لوحدي 25 يوم منعزلة وشوفت حياتي كلها قدامي وقررت أوقف الدواء وأحب نفسي زي ما أنا وقولت أنا كده كده حلوة وهسامح بابا والشهرة ونفسي على حاجات عملتها لإرضاء نفسي ومش هحتاج حد غير نفسي".

مايان السيد تكشف عن دور الحب والخوف في حياتها

وكشفت مايان السيد أنها مرت ببعض التجارب المؤلمة في حياتها بسبب الحب، حيث قالت: "كان عندي تجربة بتتعاد اللي قدامي خايف من لمعاني، فيه غيرة، غيران عليا ومني في نفس الوقت، دايماً عايز يحجمني وأنا مش دي خالص وحاولت لأني عايزة أدي الموضوع فرصة، بس في الآخر بقول لا أنا مش هعرف أبقى كده وعايزة ألمع براحتي وأكون على راحتي وأقول اللي عايزاه، يمكن أضحي لو حاجة مش هتضايقني، وبحاول دلوقتي أكسر النمط ده، ومبقيتش أطيق أقعد مع حد مادي ويتكلم عن الماديات اللي عايشين فيها، بقيت عايزة أقعد مع حد أشوف روحه بيفكر إزاي وعلاقته بربنا والحياة عاملة إزاي، بيشتغل على نفسه إزاي؟".

وكان للخوف حيز في حياة مايان، حيث كانت تشعر بالخوف وتصالحت أخيراً معه، واستطردت قائلة: "كنت بخاف من الموت جداً وبعدين تصالحت معاه وكنت قاعدة بتأمل وحسيت إن جسمي جزء من الطبيعة بس لما الروح بتروح من الجسم، الجسم بيرجع للأرض المكان اللي اتخلقت منه وروحي بتروح لربنا، هو فيه أمان أكتر من كده؟!".

وأضافت: "بخاف أبقى وحيدة بحس دايماً مبعرفش أعمل صحاب وعندي صاحبة واحدة، مش متشافة صح ومش مفهومة، بقيت أحب أبقى مع نفسي ومبحسش بوحدة مع نفسي وبخاف أحس بالوحدة وأنا مع الناس، بقعد في أوضتي لوحدي كتير أوي، والقعدة دي بتخليك ضعيف وأي فكرة بتيجي هتصدقها؛ لأن دماغك هتاكلك، بلاقي نفسي مش عايزة أتحرك، ومن هنا الدكتور شخصني ADHD".

أما عن عقدتها في الحياة والتي تسعى جاهدةً للتخلص منها، فقالت مايان: "عندي عقدة إني أكون في قعدة مع ناس بحبهم وأقول للناس إني بحبهم وبوري وأقولها كتير، ولو اللي قدامي معملش زيي ببقى مش متأكدة إنه بيحبني".

وأشارت مايان السيد الى أن أصعب مرحلة في حياتها، هي عندما رغب والداها في الانفصال، مضيفةً: "أصعب مرحلة كانت من سنة لما بابا وماما كانوا عايزين ينفصلوا ودلوقتي بقوا مع بعض، وكنت عاملة عمل مكنتش راضية عنه أوي وحسيت إني مش ناجحة وتايهة ولوحدي ومش محبوبة وبأذي نفسي لما كنت باخد الدواء واتكسرت أوي، بس عندي يقين إن مع العسر يسر، لما الواحد مننا بيتكسر أوي ربنا بيدّينا معاه القدرة والقوة نقوم بسرعة".