شنت الإعلامية بسمة وهبة، خلال برنامجها "كل يوم" الذي تقدمه على قناة ON E، هجوماً حاداً على لاعب كرة قدم في نادٍ مصري شهير، حيث انتقدت عدم التزامه وانضباطه، خاصة ما هو معروف عنه بشأن سهراته الليلية باستمرار.

وأوضحت أن اللاعب "مصنش العشرة"، مضيفة: "ولا افتكر السنين الحلوة اللي قضاها جوا ناديه، لاعب موهوب وخد كل الدعم من النادي ومن الجماهير.. خد دعم ومساندة مخدهاش لاعب غيره ومع ذلك صمم على الفشل وخذل كل اللي وقفوا جنبه".

وتابعت: "قرر يكمل في طريق الضياع.. وأهل الكورة عارفين إن الالتزام هو اللي بيخلي لاعب كورة يبقى في السما زي محمد صلاح.. وعدم الالتزام هو اللي بيدمر مواهب كتيرة زي اللاعب اللي بنتكلم عنه النهاردة.. مركون على الدكة وعنده مشاكل كتير، رغم إنه في نادي أي لاعب في مصر يتمنى بس يعدي من قدامه".

ووجهت بسمة حديثها للاعب قائلة: "ده أنت أكتر لاعب ناديه صبر عليه في مصر، وكان كل الناس بتحسدك على صبر ناديك عليك على غير العادة، تقوم في عز ما الناس كلها واقفة في ضهرك وعاوزه تساعدك عشان تقف على رجلك، تروح آخر الأسبوع اللي فات تسهر للصبح أنت عارف فين ها!! عند كورنيش النيل الجيزة.. افتكرت؟ كسبت إيه بقى من اللي أنت عملته هناك، واللي أنت كنت فيه ده، طب شكلك ايه قدام الناس اللي كانت قاعدة قدامك وجمهورك؟!".

واستكملت حديثها: "لعلمك أنا مرضيتش أنزل صورتك عشان الناس اللي كانت معاك، بس المرة الجاية هقول اسمك فخلي بالك".