منى هلا: "هأكمل 36 سنة ولا هاشفط ولا هنفخ ولا هأغير لون شعري"

أثارت الفنانة منى هلا الجدل بعد إعلانها عن سنها الحقيقي عبر حسابها على "إنستغرام"، بعدما نشرت صورة لها أثناء تصوير مسلسل "ليالي الشمال"، في مدينة هالمستاد بالسويد، وذلك في احتفالها بعيد ميلادها الـ36.

وعلقت على الصورة بقولها: "في أكتوبر السنة دي هكمل ستة وثلاثين سنة، شعري قصير ومش هصبغه لو بقى أبيض كله، مبحبش ألبس ماركات ومش فارق لي، عندي تجاعيد في قورتي وحوالين عنيا وعاجبني".

وتابعت:" مش هنفخ ولا أشفط أي جزء في جسمي، مش مهتمة أبقى راكبة عربية ولا عندي رصيد كام في البنك، ولا ساكنة في بيت شكله عامل إزاي ولا ماسكة تليفون شكله حلو، مش راضية بالتقسيمات الجندرية ولا بتصنيف البشر وفقاً للعرق أو الجنس أو الدين أو لون البشرة، مش موافقة على الرأسمالية واللي بيحصل للبشر وللعالم من وراها، مش فارق معايا مين بيقول عليا إيه ومين شايفني إزاي".

وأضافت: "ومش راضية عن المقاييس العالمية التافهة اللي بقت تتحط للجمال وربطه بالمكياج الصارخ وعمليات التجميل والماركات الغالية... رأي أي حد فيا أو الناس شايفني إزاي ميهمنيش أهم حاجة إني شخص بيحترم وبيحب نفسه زي ما أنا، القواعد الزائفة اللي بتحرك الناس دلوقتي لا تعني لي في شيء، وكل ما بكبر في السن كل ما أرفض استغلال الطبيعة، وكل المخلوقات الأضعف مني لذلك بحاول على قد ما أقدر أحافظ على البيئة ومأذييش الأضعف لأنها دايرة وهتيجي ضدي أكيد، ولأن هو ده الأبقى مش أي حاجة تانية، اللي صورني الصورة دي سليمان سيف أثناء تصوير مسلسل ليالي الشمال في مدينة هالمستاد بالسويد".