دافعت الاستايلست ريم العدل عن مهرجان الجونة السينمائي الدولي، بعد الاتّهامات التي وجِّهت إليها بأنها السبب في انتشار فيروس كورونا بين ضيوفه.

وكانت ريم قد أعلنت عن إصابتها بكورونا فور عودتها من الجونة، وطالبت المخالطين لها بعزل أنفسهم، وكتبت مدافعةً عن المهرجان: "إمبارح كتبت پوست باعلن فيه إصابتي بكورونا.. واللي أنا مش شايفاها عيب ولا وصمة.. لا أنا أول واحدة ولا آخر واحدة يا جماعة.. إحنا في وباء عالمي.. وكل واحد مصاب أو مخالط عليه مسؤولية أخلاقية يبلغ اللي حواليه على فكرة عشان ياخدوا احتياطاتهم.. المهم من أول ما كتبت الپوست وأنا عمال يجيلي مكالمات من صحفيين طالبين تصريحات ومداخلات في برامج مهمة لإدانة مهرجان الجونة ومش فاهمة ليه بجد؟ وكأن فيه ترصد لمهرجان الجونة اللي الحقيقة وبشهادة وزارة الصحة نفسها كان واخد كل الإجراءات الوقائية.. أي فعاليات مش تحت إشراف المهرجان مباشرة لا تخضع لمسئوليته وإنما هي تحت مسئولية منظميها، زائد إن كلنا أفراد راشدين مسئولين عن قراراتنا وسلوكياتنا".

وأضافت: "فنهدا شوية يا جماعة. وعلى فكرة أستاذة نشوى مصطفى ربنا يقومها بالسلامة يارب ما كانتش في الجونة أصلاً! وويجز ماكنش في مهرجان الجونة ده واحد كان مسافر الجونة مع أصحابه طيب بلاش.. تامر هاشم أعلن إصابته قبل الجونة أصلاً وأكيد تامر هاشم أشهر مني بس ما تعملش علي تصريحه الزيطة اللي حصلت إمبارح عشان ماكنش في ساعتها جونة نلوم على منظميها!! كفايا يا جماعة ارحموا نفسكوا!!.. أنا ما شوفتش ناس بتتلكك عشان توقف الحياة بالطريقة دي! ربنا يسلّم ويحفظ الكل".