في لقطة رومانسية، غازلت ناريمان زوجة المطرب رامي جمال، زوجها من خلال نشر صورة تجمعهما على "إنستغرام" وبدت فيها وهي تحتضنه من ظهره، وعلّقت عليها بالقول: "البوست دا مش بوست بتاع حب وكلام من دا، البوست دا شكر للإنسان اللي ربنا عوضني به عن كل يوم وحش وصعب عدى عليا في حياتي الشخص اللي أنا عارفة هو عمل عشاني إيه وغيَّر في نفسه إيه عشاني، كان بيحاول طول الوقت وعلى قد ما يقدر يفضل جمبي ويخرجني من اللي أنا فيه علشان عارف إن محدش هيعمل كدا غيره تعبتك معايا كتييير وصحيتك في عز نومك كتير واستحملت وعمري ما حسيتك زهقت ولا تعبت مني.. رامي اللي بيخاف يشوف حد تعبان اتعلم يدي حقن علشاني".

وتابعت: "أنا تقريبًا شخص ملوش أصحاب غير اتنين ثلاثة بالكتير أوي هما اللي بيسألوا عليا رغم إني كنت شخصاً اجتماعياً جدًا، لكن بقالي سنين وأنا مقررة أكون لوحدي مدام النفاق والكذب والزيف كتروا كده يبقى أكيد الوحدة أحلى بكتير، وأنا شخص نادرًا جدًا جدًا لما يبقى في تجمع ويلاقي نفسه شبه الموجودين ودا مش عيبهم ولا عيبي، لكن أنا شخص مش سهل التأقلم مع الآخرين".

وأضافت: "بس رامي كان دايمًا عارف يعوضني ويبقي هو جوزي وحبيبي وأصحابي كمان.. بحمد ربنا عليك وبتمنى مشفش حاجة وحشة في حياتي تاني علشان مش هستحملها وبشكر القريب اللي كنت فكراه هيبقي جمبي وملقتوش حتي بمكالمة تليفون غير كل فين وفين زيه زي الغريب، وشكرًا للغريب اللي لقيته جمبي مهتم وبيسأل وفعلاً المواقف دي اللي بتبين مين يستاهل يفضل ومين لأ وغالبًا المواقف دي هي اللي خلتني أقرر أكون لوحدي مع جوزي وأهلي وبس وأنا مرتاحة جدًا".

من ناحية أخرى، يستعد المطرب رامي جمال لطرح أغنية جديدة من كلمات الأمير سعود بن محمد عبد الله الفيصل، وشوّق رامي متابعيه لسماع الأغنية، مؤكداً أنه سوف يتم طرحها قريباً.