أعلنت الإعلامية المصرية ريهام سعيد اعتزالها مهنة الإعلام نهائياً، من أجل العودة إلى التمثيل، طالبةً مساعدة نقيب الممثلين الدكتور أشرف زكي والمخرجة كاملة أبو ذكري.

وقالت سعيد في منشور طويل عبر حسابها الرسمي في تطبيق "إنستغرام": "فكرت كتير قبل ما اكتب البوست ده. انا اعتزلت التمثيل سنه 2015 لإني حسيت ان صاحب بالين كداب وان التمثيل مأثر عليّ مسيرة الخير الي ابتديتها من سنين طويله عشان الوقت والمجهود اللي بعمله. لكن عشقي للتمثيل الي هو دراستي ومهنتي الاولى قبل الإعلام رجعت امثل تاني وانا لسه في نظر المخرجين والمنتجين مذيعه عايزه تمثل. كنت عارفه ان عشان آخد مكان كممثله لازم أسيب الإعلام زي مع حفظ الألقاب داليا البحيري وبسمه ودينًا فواد ودينا الشربيني... بس مكنتش قادره أسيب رسالتي الي كانت مهمه اوي وقتها".

وأضافت: "انا حصل لي مشاكل كتير من المهنه دي بتاثير باطل من السوشال ميديا من منافسين وأعداء بسبب المشاهدة العالية جدا والنجاح انا تعبت وحسه اني قدمت كل الي ممكن يتقدم والدولة عاملة الي عليها ومش محتاجين دور المجتمع المدني في مساعده الناس ولكن انا ليه الشرف اني اشتغلت في المهنه العظيمه دي الي ليها رساله ساميه وعظيمه وليه الشرف اني كنت اعلاميه في اصعب وقت مر على الاعلاميين ايام حكم الاخوان والحمد لله كان لينا موقف واضح وماتغيرش ولا دقيقه... انا الحمد لله حققت في التمثيل وكل الي اشتغلته علم مع الناس واشتغلت اعمال كلها قيمه بس بعد ما جالي السكر وشويه مشاكل تانيه".

وكشفت ريهام سعيد عن قرارها الجديد بالقول: "قررت اعمل الي بحبه انا بكل اسف بعلن اعتزالي الاعلام تماما وهاركز كممثله وهاطلب من الدكتور أشرف زكي انه يساعدني اني اغير الفكره الموجوده في اذهان المخرجين والمنتجين اني مذيعه. ورساله للاستاذه كامله ابو ذكري ومش مكسوفه نفسي اوي امثّل معاكي حتى لو مشهد ده من احلامي. خطوه صعبه وفيها ريسك كبير بس على الاقل اجري ورا حلمي حتى وأنا في السن ده. جه الوقت اني استمتع بالي بعمله وبحبه خصوصاً لما يكون في عصر ولا في وسطه ولا محسوبية الي هايجتهد هايوصل. ماتسيبوش حلمكم مهما فات الوقت. بشكر جمهوري من الأمهات والشباب والاطفال الي دائماً بيدعموني وحبّو برامجي واتعلموا منها وبشكر ربنا على عشرين سنه ادّاني الفرصة فيهم اني اقضي حوائج الناس وأقدّم كل ما هو مفيد. فخورة بكل حلقه وبكل حرف قدمته 20٠ سنه تعب وسهر وكان وتصميم على تقديم الحقيقه. انا آسفه ليكوا بس التمثيل رساله برضوا وهو حلمي الاساسي الي اتأخرت اوي عشان احقّقه يا رب وفقني وساعدني".