حلت الفنانة وفاء عامر ضيفة على برنامج "الستات" الذي تقدمه الإعلاميتان مفيدة شيحة وسهير جودة على قناة لنهار، حيث قالت إن هناك بعض الزوجات اللاتي يتفاجأن بزواج أزواجهن عليهن منذ سنوات طويلة، موضحة: "فيه ستات كتير بتعرف أن أزواجهم متجوزين عليهم من زمان وبتبقى صدمة لستات كتير جدًا".

وحكت موقفاً طريفاً لصديقة لها عرفت بزواج زوجها عليها بعد وفاته "أنا أعرف واحدة لبست أحمر يوم عزاء جوزها لأنها كانت بتحبه جدًا، واكتشفت إنه متجوز ومات قبلها وروحنا العزاء ولقيناها طلبت جاكيت أحمر وإلا مكنتش هتحضر العزاء ولبست جاكيت أحمر".

وعلقت على ارتفاع نسب الطلاق قائلة: "نسب الطلاق بقت عالية جدًا ومش هقول إني ضد الطلاق لكن بقول إن الطلاق يحدث زي ما ربنا قال إنه أبغضه وأبعده وفي الآخر".

وكشفت عن الأسباب التي رأتها ضرورة للطلاق قائلة: "أوافق على طلاق الزوجة لما يبقى الزوج بخيل أو بيكسب ومبيقولش لمراته هو معاه قد إيه وحارم مراته وحارم بيته، وجوده طاقة سلبية على أولاد ممكن ينجحوا في مدارسهم وممكن يأثر على أخلاقياتهم ممكن يكون بيشرب أو بيعمل حاجات غلط مش قوام يحتذى بيه".

وأضافت: "بيهين مراته لأبعد ما يمكن بشكل مستفز دائم يبقى مريض.. كل الحاجات دي مع بعض"، موضحة: "مفيش راجل هيعمل موقف شاذ وسط أسرته إلا لو فيه حاجة ضاغطاه برة ولازم ندي فرصة مرة ومش غلطة أول مرة يتحاسب عليها".

ونصحت وفاء عامر أي زوجة يخبرها زوجها بأنه ينوي الزواج عليها أن تنصحه بالزواج، موضحة: "أنا من وجهة نظري لو واحد راح قال لمراته أتجوز ترد عليه وتقوله اتجوز حتى لو فيه حاجة اتكسرت جواها وهي كانت قوية، ومبينتش صدقيني هيرجع لها تاني".

وأكدت أن من الممكن أن يكون الخطأ عند الزوجة "جايز إنتي المخطئة" واستطردت: "لو الراجل بص لغير مراته يبقى العيب فيها هي"، مشددة على أهمية الاهتمام، قائلة: "الاهتمام.. بعد سن معين أو بعد فترة معينة الست فيه تغيرات كتير بتحصل في حياتها خلينا نتكلم بشكل علمي وسيكولوجي ولازم الست تراقب نفسها هو إتجوزني شكلي إيه ودلوقتي شكلي إيه، وأنا كنت بلبس إزاي ودلوقتي بلبس إزاي وكل لما نكبر لازم نكون في حالة تطور مستمر، ونبقى في مراحل جمالية أحلى".

وتابعت وفاء عامر: "دائمًا وأبدا الراجل والست لما بيبقوا قد بعض والست بتبقى أصغر من الراجل شوية والست بتحس أن مشاعرها بتشيخ مبكرًا إلا لم تكن بتعمل للمشاعر دي مكياج".

وأكدت أن زوجها لا يستطيع أن يتزوج عليها، موضحة: "جوزي ميقدرش يتجوز عليا، أنا مش مكتباه ورقة ومش بذله ومش ماسكة عليه صور أو محسساه إن مش هتلاقي زيي، وأنا متأكدة إنه لا يمكن يكون كدة، أنا دايما بفترض في كل حاجة الحلو".

وأوضحت أنها تعلمت بعض الأشياء من أجل زوجها مثل لعب الطاولة والشطرنج، موضحة: "مثلا واحدة بتنزل تلعب طاولة مش أنت عايز واحد صاحبك وبنت صاحبتك بيلعبوا طاولة، أنا كنت بتضايق لما بلاقيه بيلعب مع بنات طاولة، وكان صوت الطاولة بينرفزني واتعلمتها مخصوص وبقيت بحبها، وهو بيحب الشطرنج فاتعلمت الشطرنج عشانه".

واعتبرت الفنانة وفاء عامر أنه ليس من المهم ما تعلمه زوجها من أجلها هي "مش مهم هو أتعلم عشاني إيه، وهو بيعرف كل حاجة وشاطر".

وكشفت وفاء عامر عن طريقة تعاملها مع زوجها، قائلة: "هو مبيقومش يقوم يجيب كوباية من المطبخ ومامته معلماه كده، وأنا مبحبش حد يقف جنبي في المطبخ وبعامله مثل سي السيد والمية لحد عنده وبأكله في بقه، هو وعمر ابني، ولو رجليه وارمة أو تعبانة ممكن أحط له مية بملح ليه لا، والله العظيم بعمل كده، وهو لو رجلي وارمة ومفيش حد في البيت هيعمل لي كده"، مضيفة: "الراجل لما بيعمل حاجة لمراته لا تنقص من قدره شيء بالعكس".