استضاف برنامج "الستات ما يعرفوش يكدبوا" على قناة "،CBC" الذي تقدمه الفنانة منى عبد الغني والإعلامية مها الصغير، سيدتين قررتا اقتحام مهنة اقتصرت على الرجال لفترة طويلة، وهي قيادة الطائرات، حيث كشفتا عن أصعب المواقف التي واجهتهما أثناء عملهما.

في البداية قالت كابتن طيار هبة درويش، إنها كانت تحلم بقيادة الطائرة منذ صغرها وأن تطير في السماء، والدخول لكابينة الطائرة، قائلة: "كان هدفًا بالنسبة لي أن أطير لذلك تعلمت قيادة الطائرة".

وأضافت: "المهنة أخدت من وقتي ولكن ادتني كتير، فمهنة الطيران تحتاج شخص ملتزم بمواعيده محافظ على نظام حياته وأن يكون حريص على وزنه ومواعيد وعدد ساعات نومه".

وعن أغرب المواقف التي واجهتها كابتن هبة درويش، كشفت: "لما كنت بقول اسمي أثناء ترحيبي بالركاب كانوا بيفكروا إني راجل وكان في ناس بتستغرب إن في ست هي اللي بتقود الطيارة"

من جانبها، قالت سارة موسى، إنها انتهت من دراسة كلية الصيدلة، ثم بعدها قررت تعلم الطيران، مضيفة: "كنت بدور على حاجة أكون فيها مختلفة، ومفيش حاجة في الدنيا أحسن من الطيران اللي كانت تديني المواصفات اللي أنا عايزاها. أنا بحب السفر مبحبش الروتين خالص، بحب أشوف بلاد مختلفة واكلات مختلفة، وناس مختلفة، فكانت المهنة دي من اكتر الحاجات اللي مدياني اللي انا عايزاه".

وحول أغرب المواقف التي حصلت مع سارة، قالت: "حصل معي موقف، الرحلة كانت إلى أوروبا يعني العقلية الناس المفروض أن هم متفتحين جدًّا، واتطلبت متأخر على الرحلة فوصلت متأخر يعني، وده مش الطبيعي على الرحلة. فلما دخلت فجأة راكبة في أول كرسي بيزنس كلاس انفجرت وقررت إنها عايزة تنزل من الرحلة رحت اتكلمت معاها وأقنعتها ولما نزلت من الرحلة غيرت رأيها".