بالفيديو - ياسمين عز تردّ على مهاجمي إطلالة نادية الجندي وهذه نصائحها للسيدات

دافعت الإعلامية ياسمين عز عن الفنانة الكبيرة نادية الجندي بعد انتقاد إطلالتها الشبابية التي ظهرت بها مؤخراً، مؤكدة أنها امرأة مهتمة بنفسها ولا داعي للهجوم عليها، كما وجهت عددا من النصائح للسيدات بشأن التعامل مع أزواجهن.

وقالت ياسمين خلال برنامجها "كلام الناس" المُذاع على شاشة أم بي سي مصر: "نادية الجندي بنتنا ولازم ندعمها وسنها إيه اللي تحترمه؟ دا إحنا اللي المفروض نحترم سننا، هو عيب الست تحافظ على جمالها؟ أنتوا عايزينها تتقوقع وتكتئب؟ ما تقولي ما شاء الله وادعي ربنا تكوني زيها وقلديها وبدل ما نضايقها بالكلام نشجعها، هو أنتي هتخللي؟ ما كلنا هنعجز".

وواصلت: "نادية الجندي في حالها ولا بتغلط في حد ولا بتجيب سيرة حد وعندها روح شبابية باينة على وشها، وأنا مش بتفرس من كلامكم ولكني بستغرب إنكم بتمسكوا فنانين برا زي جوليا روبرتس وتقولوا الله عليهم مش بيحقنوا وسايبين نفسهم، وتمجدوا فيهم، ونيجي عند بنتنا نادية الجندي نعيب عليها؟ دا المفروض نكون معاها؛ لأن أنا وأخويا على ابن عمي وأنا وابن عمي على الغريب.

كما وجهت ياسمين عز عدداً من النصائح للسيدات بشأن التعامل مع أزواجهن، قائلة: "كلمة أخيرة للستات اللي بتزهق جوزها بلاش جملة سيب فلوس قبل ما تنزل وأطفي النور وخد كيس الزبالة؛ لأنك من الصبح كدا قفلتيه، والراجل أحسن من الفلوس لأنه بيجيبها إنما الفلوس متعملش راجل، ياما ناس معاهم فلوس ومعندهمش راجل، وأنا وراكم والزمن طويل وإحنا هنا بنقول الصح".