بالفيديو - فنانة شهيرة تكشف أسباب غيابها عن الفن 20 عاماً وأسرار عودتها

23 شباط 2023 | القاهرة – "لها"

هالة أنور

حلّت الفنانة هالة أنور ضيفةً على برامج "الستات" الذي تقدّمه الإعلاميتان سهير جودة ومفيدة شيحة، في ظهورها الإعلامي الأول بعد غياب عن الساحة الفنية لأكثر من 20 عاماً.

وكشفت هالة خلال اللقاء عن تفاصيل حياتها الشخصية، وسبب ابتعادها عن الوسط الفني، قائلةً: "أنا لما بدأت وخدت قرار ابتعادي عن الفن كان سني صغير أوي، وبحكم السن الصغير ده القرار كان غلط، وأنا بدأت وكان عندي سنتين ونص، أنا كنت شايفة نفسي عملت كل حاجة استعراض وتمثيل وغناء، أكتر من 476 عمل، وخدت قرار الابتعاد وأنا في ثانوية عامة".

وأضافت: "اتخطبت وأنا عندي 16 سنة لحد من الوسط الفني مش هينفع أقول هو مين لأن له زوجة وأولاد دلوقتي، وهو اللي أقنعني أبعد عن الفن لأني عملت كل حاجة وفيه حياة وبيت، وبعد كام شهر كان في اختلاف في وجهات النظر وانفصلنا".

وتابعت: "كل اللي حواليا كانوا ضدي لما خدت خطوة الخطوبة وترك الفن واتحاربت كتير وقالولي إنتي لسة صغيرة، ووالدتي زعلت جداً وحاولت ترجعني للفن، بس أنا اتكسفت أقول إني فسخت الخطوبة وعايزة أرجع للفن".

وأردفت هالة بالقول: "الكاتب الراحل أسامة أنور عكاشة كان متبنيني، وكان أول واحد معارضني في ابتعادي عن الفن، وحتى بعد زواجي كان بيقنعني بالرجوع، وزوجي مطلبش مني أبعد عن الفن، أنا اللي بعدت، وهو مكنش عنده اعتراض لما رجعت الفن تاني في التسعينيات".

واستكملت: "بعد سبع سنين من زواجي رجعت للفن تاني وكنت بقول للقريبين مني إني عايزة أرجع للفن، وأول حد عرف إني رجعت للفن كان الأستاذ رياض العريان الله يرحمه وعملت معاه مسلسل "أفواه وأرانب"، وصورته في اليونان، ومخرج سهرة "ابتسامة الجيوكندا"، قالي أنا كان حلمي من وأنا مساعد مخرج إني أبقى مخرج علشان أشتغل معاكي، ودلوقتي حلمي اتحقق".

وعن سبب غيابها عن الوسط الفني، قالت: "اختفيت عن المجال 20 سنة لأني ملقتش مكان، وطبعي من وأنا صغيرة بتكسف جداً ومقدرش أروح شركات الإنتاج وأقول عايزة اشتغل، وفي شركات إنتاج جديدة ومنتجين ميعرفونيش، واتخضيت من كبر المجال وجالي نوع من الإحباط، ولما كنت بشوف دور في عمل ونفسي أعمله كانت دموعي بتنزل وبكلّم نفسي أمام المراية".

وعن آخر أعمالها قالت هالة أنور: "اشتغلت في مسلسل "ضل راجل" مع ياسر جلال في رمضان، وجاتلي مكاملة منه اتخضيت لما لقيت اسمه وكنت فاكرة أن الأسماء متشابهة، وقولتله أنت لسة فاكرني؟ قالي في حاجات مينفعش تتنسي وأنتي عملتي مسرحية مع بابا وقالي تفاصيلها، وياسر جلال ابن أصول أوي وفيه جدعنة ولاد البلد".