خلال لقائه مع برنامج "رؤيا مصر" على التلفزيون المصري، عبر الفنان محمود العسيلي عن سعادته الكبيرة بإطلاق أغنية "سمع هس" التي أداها في فيلم "بيت الروبي" مع كريم عبد العزيز وكريم محمود عبد العزيز.

وقال العسيلي: "أحب أحيي أحمد طارق يحيى وفلبينو على الأغنية والكلام واللحن والتوزيع والتعاون مع كريم عبد العزيز وكريم محمود عبد العزيز حاجة في منتهى اللذاذة واللطافة والسلكان ورغم إن كريم عبد العزيز رقم واحد في مصر لأن أرقامه بتقول كده في كل فيلم ليه وكل نجوم مصر فوق راسي لكن دي الحقيقة ومع ذلك شخص لطيف جدًا وسلس في التعامل وبحييهم وسعيد بالتعاون معاهم".

وبسؤاله عن رأيه في رقم واحد في الغناء قال: "عمرو دياب هو رقم واحد، مافيش مقارنة لأن زيه زي أم كلثوم وعبد الحليم حافظ وطبعاً منير جامد وكل حاجة لكن عمرو دياب لا يقارن".

وكشف العسيلي عن رأيه في لقب مطرب الإعلانات بعد نجاحه في العديد من الإعلانات قائلًا: "أنا مش مع الكلام ده، مفيش حاجة اسمها مطرب إعلانات دي أغاني بتنجح لإعلان وبتوصل للناس ودي حاجة صعبة ومش أي حد يقدر يعملها" .

وعن إتهامه الدائم بالغرور قال: "أعوذ بالله من الغرور، لكن لكل مقام مقال أنا بس ضد الحاجة اللي مش في مكانها ومع ذلك دلوقتي حتى لو حاجة مش في مكانها معنديش مشكلة خلاص اتعلمت من أخطائي".

وكشف العسيلي خلال اللقاء عن سعادته بنجاح حفلاته الأخيرة في الولايات المتحدة الأميركية للجمهور العربي وأنه يستعد للعديد من الحفلات خارج مصر وداخلها وخصوصا بالساحل الشمالي.

كما كشف أيضا عن أغانيه القادمة وقال: "صورت أغنيتين في أمريكا واحدة اسمها بايظة والتانية "مين كان يصدق" وعندي أغنيتين مع تامر حسين وعزيز الشافعي واحدة منهم اسمها "اوعى" والتانية لسة بنفكر في اسمها وكمان عندي أغنية اسمها "خطير" مع الموزع رامي سمير وفلبينو".