ماجد المصري يكشف رد فعل زوجته وأبنائه على دوره في "إش إش" (فيديو)

خلال حلوله ضيفاً على برنامج "الحكاية" الذي يقدّمه الإعلامي عمرو أديب على قناة "mbc مصر"، كشف الفنان ماجد المصري عن رد فعل زوجته وأبنائه المفاجئ على إطلالته في مسلسل "إش إش"، مؤكداً أنهم سخروا منه قبل البدء بالتصوير.

وقال المصري: "المخرج محمد سامي هو اللي خلاّني أحلق شعري أقرع بالموس، علشان يتناسب شكلي مع شخصية "رجب الجريتلي" بمسلسل "إش إش"".

وأضاف: "أنا بثق في محمد سامي، وعلشان كده شيلت شعري بالموس ومقولتش لمراتي، وسافرت ليها الساحل ولابس كاب وكانت المفاجأة، قالت لي إيه ده؟ يا ماجد إنت متخرجش معايا كده وقفشت".

وتابع: "لما حلقت شعري أقرع مراتي قفشت وولادي اتريقوا عليا وعملوا بصورتي وأنا أقرع غروب على "واتس آب" ومش هقول اسم الغروب ممرمطني في البيت، أما داليدا بنتي الصغيرة فقالت لهم يا جماعة إيه المشكلة لما نعرف بس الدور، عندها وعي فني فقلت لها إنتي كده صبّرتيني".

وأردف ماجد المصري بالقول: "محمد سامي كان قايل لي إن ترقيصة الشخصية دي إن الحدوتة اللي بينك وبين "إش إش"، قصة حب، بقول له تاجر مخدرات ومعلم، قال لي ما هو ده السر عايز شخص فاهم وفارس".

من جانبها، غازلت رانيا زوجها ماجد المصري على الهواء، قائلةً: "رجوبي، هو بقى رجوبتنا كلنا، بجد من قلبي فرحانة ومش متضايقة خالص إن البنات بتجري وراه في الجونة، لإن ده نجاح لدوره بمسلسل إش إش""، في إشارة الى دور "رجب الجريتلي" الذي يقدّمه في المسلسل.

وتابعت: "أنا مبسوطة بالنجاح الفظيع وهو يستاهل ومش متضايقة إن الستات بتعاكسه وصحابي قالولي اقفلي على ماجد المصري بعد الدور، وهو فعلاً شخصيته "رجب الجريتلي"، ما عدا تجارة المخدرات".