محمد رمضان يردّ على جدل إطلالته في أميركا ويكشف مفاجأة (فيديو)

حلّ الفنان محمد رمضان ضيفاً على برنامج "صباح العربية"، المذاع على قناة "العربية"، حيث كشف العديد من أسرار حياته الشخصية وتفاصيل مشواره الفني، وتحدّث عن اختياراته في أعماله، وحقيقة تعمّده إحداث الجدل بشكل مستمر.

في السطور التالية نقدّم لكم أبرز تصريحات محمد رمضان:

 - نجاحي المالي عمره ما غيّر اختياراتي الفنية، وطول الوقت بشتغل بروح الهاوي، واختياراتي الفنية بناء على طمعي في جمهوري.

- بعد مسلسل "الأسطورة" أي ممثل مكاني كان هيعمل "الأسطورة 2" رمضان اللي بعده، ولكني رحت عملت شخصية ضابط بوليس.

 - أنا موش مبتعد عن الدراما، وغبت عنها لثلاث سنوات لأني كنت مشغول بفيلم "أسد"، هو فيلم مهم ومحتاج وقت في التحضير والتصوير، وخلصت الفيلم ودلوقتي جاهز أعمل مسلسل لرمضان 2027 واستنوه على MBC.

- الجمهور يعرف عني كل حاجة، النجم بيقرر يصنع العلاقة بينه وبين الجمهور، وأنا اخترت أصنع علاقة مع الجمهور واضحة من كل الأركان، الجمهور شافني في كل حاجة، شاف ولادي وعيشت معاه كل مراحل حياتي، فيه نجم آخر ممكن يختار إن اللي بينه وبين الجمهور شغل والجمهور ميتدخّلش في حياته الشخصية.

محمد رمضان: عبد الحليم حافظ هو المرجع في تعاملي مع الجمهور

- إحنا عندنا مرجع قديم جداً وهو علاقة عبد الحليم حافظ بالجمهور، ده دخلنا أوضة نومه وشفنا السرير اللي بينام عليه وهو عيّان وشفنا الأدوية وبيته، ما حدّش ضربه على إيده ولكنه قرر يصنع علاقة عظيمة مع الجمهور وكلنا كنجوم بنحاول نقتدي بيه.

- الإنكليزي بتاعي مش مثالي ولكني مبعطلش مع فريقي وهما نصهم أمريكاني، وأنا بشوف إن الفن في حد ذاته لغة، والموسيقى والتمثيل لغة، يعني المشاعر واحدة، الحزن والفرح والدهشة كلهم شيء واحد.

- أنا عارف إن الخطوات اللي بناخدها النهاردة علشان مالهاش مرجع فالعقل بيعطل، وعلشان محمد رمضان قدر من المنطقة العربية بلغته وثقافته يخترق الحدود والحواجز، وده طبيعي زي أول واحد طلع على القمر الناس كانوا شايفينه مجنون وإزاي يعمل كده، ولكن مع تاني وتالت ورابع واحد لقوا إن بقى فيه استقبال لأن بقى فيه واحد مرجع ليهم.

 - الشهرة أخدت بعض المساحات من حياتي الشخصية ولكن بكل رضا وحب، عمري ما حسّيت إني مظلوم والشهرة ظالماني، أنا راضي بضريبة طريقي وأي ضرائب هدفعها هتكون بكل حب ورضا لأني تمنيتها من قلبي من ربنا، فعندما يحققها ربنا هشوف سلبيتها إيه، أنا شايف إن كل شيء في مكانه وقابل الأكتر والأكتر منه.

 - مش مقصود إني أعمل الجدل، المقصود زي العلاج بالضبط، أنا بستهدف شريحة فبيحصل آثار جانبية عند شريحة أخرى، زي ما بتاخد علاج للكبد فيضعّف وظائف الكلى، أنا ممكن أبقى بعمل شيء أخاطب بيه الشريحة C، فيقوم الشريحة A وB يزعلوا، فأعمل مشروع ليهم، فأنت طالما حريص تكسب كل الشرائح ارتضي إن فيه بعض الشرائح هتفهم غرضك إيه من تصرفاتك.

 - أكيد بعض النقد تحول لهجوم شخصي عليَّ، لأن النجاح السريع بيستفز بعض الناس اللي بتبقى عايزة تقدّم مبررات لفشلها، فبيبقى عايز يقول إن اللي معندوش واسطة مبينجحش، طيب ما محمد رمضان ماعندوش واسطة ونجح، دايماً الفاشل ميحبّش الناجح، وبالتبعية الناجح ميحبّش الفاشل، وأنا محبش الفشلة نهائي.

محمد رمضان: لم أندم على أي قرار اتّخذته في حياتي

- عمري ما ندمت على أي قرار في مسيرتي الفنية، كل مشروع عملته كان مدروس وبناء على خطة ووعي ودراسة، الوعي قبل السعي، يعني أنا بخاطب مين ده أول سؤال بسأله قبل ما أعمل مشروع.

 - الناس انتقدوا لبسي بشكل كبير في المنطقة العربية في حفلي بـ"كوتشيلا" ولكن أنا شغال لمستمعين تانيين خالص، أنا عامل آلاف الحفلات في الشرق الأوسط عمر ما حد انتقد لبسي في حفلاتي بالشرق الأوسط، ولكني درست كوتشيلا، ودرست أنه مهرجان قائم على الابتكار واللبس اللي مش طبيعي، واجتهدنا وجبت مصمّمة أزياء مصرية وعملت الشكل.

 - الناس وجهوا اللبس في حتة مش مظبوطة، ولو رجع الوقت تاني هلبس نفس اللبس ولكن هاخد بالي من بعض التفاصيل وهطوّل الدرع الفرعوني أكتر وهخلّي شكله أفضل، ولكن مكنتش هغير الإطلالة خالص.

شارك