كشف الفنان محمد الشقنقيري على حسابه الشخصي بـ"فيسبوك" عن تطورات الدعوى القضائية التي أقامها ضد الموديل رحيل التي ادعت أنه زوجها.

ونشر الشقنقيري صورة لحكم المحكمة، مؤكداً أنه حصل على حكم ضد الموديل، قائلاً: "أنا مرضتش اتكلم في المشكلة اللي حصلت إلا بعد ما القضاء يقول كلمته، وحقيقي شيء مؤسف جدا إنك تضطر إنك تاخد رد فعل عنيف كده مع أي حد خصوصا لو واحدة ست في قضية زي دي بس كمية الكذب والأفلام اللي اتعملت كانت أكتر من إن أسيبها من غير ما آخد رد فعل قانوني".

وأضاف :"أنا التزمت الصمت تماما ولجأت إلى القضاء ورفعت قضية من شهر 6 اللي فات وبعد تحريات النيابة والأدلة اللي قدمتها واللي بتثبت كذب ادعاء المتهمة تم تحويلها للقضاء وتم الحكم عليها وتم إثبات إن كل الكلام اللي قامت المتهمة بنشره هو كذب وتلفيق".

وتابع الشقنقيري: "والسادة الصحفيين اللي بيكلموني عشان يعرفوا اللي أنا قدمته في النيابة أنا بعتذر جدا لأن السوشيال ميديا مش المكان اللي الواحد بياخد حقه فيه والتصريح الوحيد اللي عندي قلته إن أنا كنت راجل مطلق وأعزب وخرجت كتير ولن أخوض في عرض أي شخص ظهر معي أثناء فترة طلاقي، لكني لم أتزوج أي امرأة ولا رسمي ولا عرفي ولا حتى شفوي في حياتي إلا زوجتي".

وأكمل: "وللأسف برضه إني دي لسه أول قضية وهي إثبات كذب كل ما تم نشره على السوشيال ميديا ولسه المتهمة ستواجه 3 تهم أخرى و3 قضايا أخرى وهم الابتزاز والسب والقذف والتعويض، وحاليا مطلوب القبض على المتهمة من جهة تنفيذ الأحكام، لأن مافيش حد بيقول إنه متجوز بشوية صور، وطبعا ده غير إن المتهمة حكت حوالي 5 قصص مختلفة مرة قالت عرفي ومرة رسمي ومرة قدام مأذون ومرة قدام محامي وكل ده متسجل في تحريات النيابة".

وأردف: "اللي بيتجوز لازم يكون في عقد أو أي ورقة لكن حد خرج مع حد كام مرة ده مش اسمه جواز، وأنا مغلطش في حق أي حد لا صورت حد وفضحته ولا شتمت حد ولا اتجوزت وأنكرت، وإذا كان في طرف حب يخرب حياتي بشوية كذب لما عرف أن أنا ومراتي رجعنا لبعض فدي مشكلته هو".

واختتم الشقنقيري حديثه: "وأخيرا أنا بعتذر للناس اللي اتضايقوا وبشكر كل الناس المحترمة اللي استنوا لحد ظهور الحكم عشان يتكلموا في الموضوع وأخيرا سوف يتم اتخاذ الإجراءات القانونية ضد أي شخص أو منصة أو جريدة تنشر أي أخبار متعلقة بهذا الموضوع دون أي دليل قضائي أو دون الرجوع إلي، وأظن أن بعد حكم المحكمة مافيش كلام تاني".

وكانت رحيل نشرت صورة، عبر حسابها الرسمي بموقع "إنستجرام"، وعلقت عليها :" أعلن انفصالي نهائيا ورسميا عن محمد الشقنقيري وختامها مسك مع شوية تحابيش كدا، وسيبوني في حالي بقي كله ضرب ضرب مافيش شتيمة".