كريم فهمي يكشف رأيه في الحب الأول ويفجّر مفاجاة عن انفصال والديه

02 أيلول 2025 | القاهرة - "لها"

كريم فهمي

حلَّ الفنان كريم فهمي ضيفاً على برنامج "كلام نواعم" المذاع على قناى mbc، في أولى حلقاته بعد عودته على الشاشة، حيث تحدث عن كواليس مسلسل "220 يوم" الذي عرض مؤخراً واصفًا إياه بالمرهق نفسيًا.

قال كريم: "المسلسل دا عملي كوابيس ولحد النهاردة بصحى من النوم في كوابيس رهيبة لأني قعدت سنتين أو أكتر شغال عليه تعبني نفسيًا جامد من أول الكتابة لحد ما خلصنا تصوير".

وعن فكرة أن البطل في المسلسل أخفى على زوجته مرضه وإن كان كريم فهمي في الواقع يخفي عن زوجته بعض الأمور قال: "في اللحظة دي مش فاكر إن كان حصل وخبيت عليها لكن أنا ذاكرتي ضعيفة دايمًا لما بيكون في حاجة بحكيها لمراتي لأنها هي اللي هتشيل المعلومة، على المستوى الشخصي أنا بحب المشاركة".

أضاف: "الصراحة مهمة لأن الزوجين بقوا واحد في كل حاجة أنا بحب دايمًا أن كل الحاجات اللي ممكن تكون بتحصل على مستوى الشغل والحياة اليومية اللي ينفع تتقال بقولها على طول، ودا بالنسبة لي لأن كل واحد حياته وظروفه مختلفة، أنا راجل مش بعرف أعمل غير شغلي وهي قايمة بباقي الحاجات".

واستكمل كريم كلامه قائلاً: "المسلسل قصة حب بين أحمد ومريم وأصعب حاجة في صناعة عمل أن الشرير بتاع العمل أنت مش عارف تمسكه بإيدك لأنه "المرض" هو دا صعوبة المشروع دا بالذات، البطل مرضيش يقول لمراته لأنها كان عندها حلم بقالها سبع سنين نفسها تخلف ولما بقت حامل اكتشف إنه مريض، دي كانت ظروفه قرر ميقولهاش، ربنا يبعد عننا".

كريم فهمي: أشعر بالامتنان لانفصال والدي ووالدتي

وأكد كريم أنه الحب الأول في حياة بناته، مضيفا أن تجربة انفصال والديه في وقت مبكر، أثرت عليه بالإيجاب حيث ساهمت في تكوين شخصيته.

وأضاف: "أنا الحب الأول في حياة بناتي، وأتمنى يلاقوا الحب الأكبر في حياتهم قدام، ودانيا مراتي هي اللي بتخلي فيه توازن في حياتنا، بين الحياة الاجتماعية والعملية".

وتابع كريم فهمي: "انفصال أهلي وأنا عندي 16 سنة هو اللي كوّن شخصيتي، وخلاني أعتمد على نفسي وعرفت قيمة القرش أكتر، ساعتها ممكن تكون أوحش حاجة حصلت لي، بس لما كبرت عرفت إنها أهم حاجة حصلت لي وممتن لأهلي على الانفصال اللي خلاني معتمد على نفسي كده".