قالو وراها

قالو وراها ما رثته الصّحافه		قلت السّيوف وصهوة الخيل ترثيه
عدّ النصف يا الّلي تعرف النّصافه		إبن مساعد وش فعل في مباديه
دايم وخشم الرّمح يرعف رعافه		الرّمح يطعن به وسيفه يروّيه
وانشد ميادين الوغَى كيف شافه		ضدّه من الفرسان يومه يدنّيه
الفارس الّلي ما يعرْف المخافه		إلاّ مخافة والي العرش تثنيه
فيه الشّهامه والورع والنّظافه		نظيف عرضٍ ما يدنّس مواطيه
وفيه الكرم والجود راعي ضيافه		ذولا يغَدّيهم وهذا يعشّيه
علَى العدل ميزان والظّلم آفه		لَى جاه مظلومٍ له الحق يعطيه
ما نال ضدّه غير ثوب الكسافه		والاّ رفيقه بالمعزّه يباريه

شارك