رسالة إلى غريب الدّار

يا غريب الدّار من دارك لفيت *

                                      أنقل الأشواق واحمل لك سلامْ

كل روضْ وكل طعْس وكل بيت

                                      أرسلوا معنا سواليف وْكلامْ

  من روايح زاهر الرّوض انتشيت

                                     والخزامَى* والنّفل* ريحه غرامْ

والفَجر معْ سارحاته لك مشيت

                                     نسمته والطير وظبيّ العدامْ *

كلّهم لك حلّفوني لو حكيت

                                      أحلف ان الشّوق جا حدّ الهيامْ

والصّديق يقول والله مانسيت

                                      والقريب يقول سلواكم حرامْ

كل نظرة حب منها لك خَذَيت*

                                      ومضةٍ تشعل دياجير الظّلامْ

صوت دقّات الخوافق لَى طريت*

                                      مثل حبّات المطَرْ فوق الخيامْ