لمت الزّمان

لمت الزّمان ولايم الوقت غلطان

كلٍ يغنّي معْ زمانه علَى شان

وانا نديم الوجد في ليل الاشجان

ياما جرحت بونّتي ليل الاحزان

وياما رقص معْ نغمة الحب نشوان

قصيدتي رعشة خفوقٍ ووجدان

قصيدتي غنّيتها روح الانسان

الّلي غدَى في شوفة العين ميزان

يا عايشٍ بالّلو والّليت خسران

يروح عمرك بين لو كان ما كان

حوادث الايّام من فعل اهَلْها

هذا يميّلها وهذا عدلْها

أجاذب نْجوم الّليالي غزلْها

ياما سمع منّي وياما حملْها

ينفض عن النّجمات وحشة ملَلْها

صوّت بها السّاري وردّد مثلْها

الّلي معانيها بروحه صقلْها

غيره إلَى شافتْه عيني خذلْها

دنياك ما تسوَى حسايف زلَلْها

والعمر ساعه ما تساوي عذلها